இந்த ஆண்டு பெய்த பருவமழையை நம்பி டெல்டா பகுதிகளில் பெரும்பாலான விவசாயிகள் சம்பா பயிர் நடவு செய்துள்ளனர். தற்போது சாகுபடி பணிகள் தீவிரமாக நடைபெற்று வரும் நிலையில், பின்னவாசல் கிராமத்தில் சம்பா பயிர்களுக்கு பாசனநீர் இல்லாமால் நிலங்களில் வெடிப்பு ஏற்பட்டு பயிர்கள் கருகும் நிலை ஏற்பட்டுள்ளது.
இதுகுறித்து விவாசாயிகள் கூறுகையில், வருடந்தோறும் இந்தப்பகுதியின் முக்கிய பாசன ஆறாக உள்ள வெள்ளையாறு மூலம் கிடைக்கும் நீரை வைத்து சாகுபடி செய்து வந்தோம். ஆனால் இந்த ஆண்டு அரசு அலுவலர்களின் அலட்சியத்தால் பாசன வாய்க்கால்களில் நீர் திறக்கப்படவில்லை.
இதனால், ஆற்று நீரானது விவசாயிகளுக்கு உபயோகம் இல்லாமல் நேரடியாக கடலில் கலக்கிறது. இதுகுறித்து சம்பந்தப்பட்ட பொதுப்பணித்துறை அலுவலர்களைச் சந்தித்து, பாசன வாய்க்கால்களில் தண்ணீர் திறந்து விட கோரிக்கை வைத்தோம்.
பொதுப்பணித்துறையினர் எங்களது கோரிக்கையை கண்டுகொள்ளாததால் தற்போது 147 ஏக்கருக்கு மேல் பயிரிடப்பட்ட சம்பா பயிர்கள் கருகும் நிலைக்குச் சென்றுள்ளது. எனவே, தமிழ்நாடு அரசு இப்பகுதியிலுள்ள பாசன வாய்க்கால்களில் தண்ணீர் திறப்பதற்கான வழி வகைகளைச் செய்து கருகும் நிலையிலுள்ள சம்பா பயிர்களைக் காப்பாற்ற நடவடிக்கை எடுக்க வேண்டும்" என்று கோரிக்கை விடுத்துள்ளனர்.
இதையும் படிங்க: 'மாணவி தற்கொலை தொடர்பாக வதந்திகளைப் பரப்பாதீர்' - சென்னை ஐஐடி
