திருவாரூர்: நன்னிலம் அருகேவுள்ள குருங்குளம் கிராமம் இந்திரா நகரைச் சேர்ந்தவர் கூலித் தொழிலாளி கேசவன். இவரது மனைவி ராதா. குடிசை வீட்டில் தங்களது இரண்டு பெண் பிள்ளைகளுடன் வசித்து வருகின்றனர். இதில், இரண்டாவது மகள் ஷாலினி, பன்னிரண்டாம் வகுப்பு வரை அரசுப் பள்ளியில் படித்துவிட்டு, தற்போது மயிலாடுதுறை மாவட்டத்தில் இயங்கிவரும் தனியார் கல்லூரியில் முதுகலை பொருளாதாரம் படித்து வருகிறார்.
இவர் மாநில, தேசிய அளவிலான கைப்பந்து போட்டிகளில் பங்குபெற்று பல சான்றிதழ்கள், பதக்கங்களைக் குவித்துள்ளார். இவர், வருகிற செப்டம்பர் 27ஆம் தேதி நேபாளத்தில் நடைபெறவுள்ள இந்திய - நேபாள 8ஆவது சர்வதேச இளையோருக்கான விளையாட்டுப் போட்டியில் பங்கு பெற தகுதி பெற்றுள்ளார்.
இதனைக் கேட்டு பெரும் மகிழ்ச்சியில் இருந்த ஷாலினிக்கு, பெரும் தடையாய் வந்தது பணப் பற்றாக்குறை. வறுமையின் காரணமாக தனக்கு சரியான ஸ்போர்ட்ஸ் ஷூ கூட வாங்க இயலாமல் கிழிந்து போன ஷூவை வைத்து பயிற்சி பெற்று வரும் நிலையில், நேபாளம் செல்வதற்கு வசதி இல்லை என மன வேதனையில் இருக்கிறார்.
வேதனையில் தந்தை
இது குறித்து ஷாலினியின் தந்தை கேசவன் கூறுகையில், “நானும் எனது மனைவியும் கூலி வேலை செய்து, அதில் கிடைக்கும் சொற்ப வருமானத்தை வைத்து குடும்பத்தை நடத்தி வருகிறோம். இதில், பெரும் பகுதியை இரண்டு பெண்களின் கல்விக்காக செலவு செய்து வருகிறேன்.
நேபாளத்தில் நடைபெறும் சர்வதேச விளையாட்டுப் போட்டியில் பங்குபெறத் தகுதிபெற்ற என்னுடைய மகளுக்கு, புதிய ஆடை, ஷூ எடுத்துக் கொடுப்பதற்கு கூட வசதி இல்லாமல் தவித்து வருகிறோம்.
எங்கள் குடும்ப சூழ்நிலையை கருத்தில் கொண்டு தமிழ்நாடு முதலமைச்சர், மாவட்ட ஆட்சியர், தனியார் தொண்டு நிறுவனங்கள் ஏதேனும் உதவி செய்தால், என்னுடைய மகள் தமிழ்நாட்டிற்கு மட்டுமல்லாமல் இந்தியாவிற்கே பெருமை சேர்த்து கொடுப்பாள் என்ற நம்பிக்கை உள்ளது” என கண்ணீர் மல்க தெரிவித்தார்.
நம்பிக்கையுடன் பேசும் ஷாலினி
இதுகுறித்து மாணவி ஷாலினி கூறுகையில், “ஒலிம்பிக் போட்டியில் விளையாடி இந்தியாவிற்குப் பெருமை சேர்த்துக் கொடுக்க வேண்டும் என்ற ஏக்கத்துடன் காத்திருக்கிறேன். எனக்கு தமிழ்நாடு அரசு உதவி செய்தால் கண்டிப்பாக இந்தியாவிற்குப் பெருமை சேர்த்துக் கொடுப்பேன்” என்கிறார்.
இதையும் படிங்க: உலக சாதனை படைக்க கர்நாடகா செல்லும் திண்டுக்கல் மாணவர்கள்
