திருவாரூர்: முத்துப்பேட்டை அடுத்த தில்லைவிளாகம் மேலக்கரை கிராமத்தைச் சேர்ந்தவர் பழனித்துரை மனைவி ஜெயம். 65 வயது மூதாட்டியான இவருக்கு குழந்தைகள் இல்லை. இவரது கணவர் 10 வருடங்களுக்கு முன்பு இறந்து விட்டதால், இவர் மட்டும் தனது வீட்டில் தனியாக வசித்து வந்துள்ளார். இவருக்கு வீட்டுடன் உள்ள கோயில் சொத்தும், வேறு இடங்களில் சில நிலங்களும் உள்ளதாகக் கூறப்படுகிறது.
இந்த நிலையில், வாரிசுகள் யாரும் இல்லாததால், அவரின் உறவினர்கள் சிலரே அவரை பராமரித்து வந்துள்ளனர். மேலும், அவர்கள் ஜெயத்தின் சொத்துக்களுக்கு ஆசைப்பட்டு, அவரை பராமரித்து வந்ததாகக் கூறப்படுகிறது. இந்த நிலையில், சுமார் 6 வருடங்களுக்கு முன்பு, மூதாட்டி ஜெயத்தை பராமரித்து வந்த அவரது உறவினர் ஒருவர், மூதாட்டி எங்கும் செல்லாத வகையில், அவரை வீட்டின் உள்ளே வைத்து பூட்டி சிறை வைத்து, ஜன்னல் வழியாக சாப்பாடு கொடுத்து வந்துள்ளார்.
இப்படியாக பூட்டிய வீட்டில் அடைக்கப்பட்டு ஆறு வருடங்கள் கடந்த நிலையில், மின்சாரம் மற்றும் குடிநீர் வசதி ஏதுமின்றி, சரியான உணவும் வழங்கப்படாமல் பெரும் துயரத்தை அனுபவித்து வந்துள்ளார், மூதாட்டி. அதோடு உடல்நிலை முற்றிலுமாக பாதிக்கப்பட்டு, அங்கேயே இயற்கை உபாதைகள் கழித்தும், அதே இடத்தில் உறங்கியும், போதிய பராமரிப்பு இல்லாமல் ஜெயம் உடல் மெலிந்து தற்போது பரிதாபமான நிலையில் உள்ளார்.
முன்னதாக, வீட்டிலிருந்து துர்நாற்றம் கடுமையாக வீசிய நிலையில், இது குறித்து சுற்றுப் பகுதியில் வசிக்கும் மக்கள் சம்பந்தப்பட்ட ஜெயத்தின் உறவினரிடம் விசாரித்துள்ளனர். அதற்கு அவர்கள் மிரட்டும் தொனியில் பேசியதால், சுமார் 6 வருடங்களாக வெளியில் சொல்லாமல் இருந்து வந்துள்ளனர்.
இதையடுத்து, நாளடைவில் அந்த பகுதியைக் கடந்தாலே துர்நாற்றம் வீசி வருவதாலும், அந்த மூதாட்டி தற்போது ஆபத்தான நிலையில் இருப்பதாலும், சிலர் மூதாட்டியின் நிலையை வீடியோ எடுத்து, சமூக வலைத்தளங்களில் பரப்பி உள்ளனர். இதையடுத்து, அப்பகுதியில் பெரும் பரபரப்பு ஏற்பட்டுள்ளது.
இதைத் தொடர்ந்து, “இது குறித்து மாவட்ட ஆட்சியர், எஸ்பி முதல் லோக்கல் அதிகாரிகளின் கவனத்திற்கும் கொண்டு சென்றுவிட்டோம். இருப்பினும் எந்த நடவடிக்கையும் இல்லை. கடைசியாக தமிழக அரசின் சைல்டு லைன் 14567 நம்பருக்கும் தகவல் கூறியும், இதுவரை எந்த நடவடிக்கையும் எடுக்கப்படவில்லை. உடனடியாக பாட்டியை விடுவித்து, அடைத்து வைத்து தவறு செய்த அந்த நபர் மீது கடுமையான நடவடிக்கை எடுக்க வேண்டும்" என பொதுமக்கள் கோரிக்கை வைத்துள்ளனர்.
இதையும் படிங்க: 4 வயது மகனை கொன்று சூட்கேஸில் எடுத்துச் சென்ற தனியார் நிறுவன பெண் சி.இ.ஓ.. நடந்தது என்ன?
