குண்டும் குழியுமாக மாறிய புதிய பேருந்து நிலையம்!

திருவாரூர்: திருவாரூர் நகராட்சி நிர்வாகத்தின் அலட்சியத்தால் குண்டும் குழியுமாக மாறிய புதிய பேருந்து நிலையம் சாலையைச் சீரமைக்க வேண்டுமென சமூக ஆர்வலர்கள் கோரிக்கைவிடுத்துள்ளனர்.

திருவாரூர் அருகே உள்ள விளமலில் புதிய பேருந்து நிலையம் அமைக்கப்பட்டு அதற்கான சாலை வசதியும் செய்துகொடுக்கப்பட்டது.

இப்பேருந்து நிலையத்தில் 100-லிருந்து 200-க்கும் மேற்பட்ட பேருந்துகள் இயங்கிவருகின்றன. குறிப்பாக தஞ்சாவூர், மன்னார்குடி, நாகப்பட்டினம், திருச்சி, மயிலாடுதுறை உள்ளிட்ட பேருந்துகள் இயக்கப்பட்டுவருகின்றன.

குண்டும் குழியுமாக மாறிய புதிய பேருந்து நிலையம்!

தற்போது புதிய பேருந்து நிலையத்தில் சாலை போடப்பட்ட ஆறு மாதங்களிலேயே குண்டும் குழியுமாக காட்சியளிப்பதால் பொதுமக்களும் வாகன ஓட்டிகளும் பயன்படுத்த முடியாத அவலநிலை ஏற்பட்டுள்ளது. மேலும் பேருந்துகள் பெரிய பள்ளங்களில் தட்டுத்தடுமாறிச் செல்வதால் பயணிகள் அச்சத்துடன் பயணம் செய்துவருகின்றனர்.

இரவு நேரங்களில் பாதசாரிகளும் இருசக்கர வாகன ஓட்டிகளும் பள்ளத்தில் விழுந்துவிடும் அவலநிலை கடந்த 6 மாதங்களுக்கு மேலாக நீடித்துவருவதால் நகராட்சி நிர்வாகத்தினர் சாலையைச் சீரமைக்காமல் அலட்சியம் காட்டிவருகின்றனர். இந்த அவலநிலை தொடர்ந்து நீடித்துவருவதாக சமூக ஆர்வலர்கள் குற்றம் சாட்டுகின்றனர்.

குண்டும் குழியுமாக மாறிய புதிய பேருந்து நிலையம்

இது குறித்து பல முறை நகராட்சி நிர்வாகத்திடம் புகார் அளித்தும் எந்த ஒரு நடவடிக்கை எடுக்காமல் இருந்துவருகின்றனர். இதனால் உடனடியாக மாவட்ட நிர்வாகம் கவனத்தில்கொண்டு திருவாரூர் நகராட்சிக்குள்பட்ட புதிய பேருந்து நிலையத்தின் சாலையில் உள்ள பள்ளங்களைச் சீரமைத்துக் கொடுக்க வேண்டும் எனச் சமூக ஆர்வலர்கள் கோரிக்கைவிடுத்துள்ளனர்.

குண்டும் குழியுமாக காட்சியளிக்கும் திருவாரூர் புதிய பேருந்து நிலையம்

இதையும் படிங்க: தமிழ்நாட்டில் அறிமுகப்படுத்தப்பட்ட நெடுந்தொலைவு மின்சார ரயில்