திருவாரூர் மாவட்டம் நன்னிலம் அருகேயுள்ள கமுகக்குடி கிராமத்தில் சுமார் 500-க்கும் மேற்பட்ட குடும்பங்கள் வசித்துவருகின்றன. 2015-2016 ஆம் ஆண்டு பலகட்ட போராட்டங்களுக்குப் பிறகு, அரசு சார்பில் அப்பகுதி மக்களின் கோரிக்கையான மயான கொட்டகை அமைத்துத் தரப்பட்டது. மயான கொட்டகை அமைத்துத் தந்தவர்கள், அங்கு செல்வதற்கான சாலை வசதி செய்து தரவில்லை.
மழைக்காலங்களிலும் இயற்கை பேரிடர் காலங்களிலும் மயான கொட்டகைக்குச் செல்ல முடியாமல் அப்பகுதி மக்கள் சிரமப்பட்டு வருகின்றனர். மயான பூமிக்குச் செல்லப் பாதை இல்லாததால், இறந்தவர்களின் உடல்களைத் தூக்கிக் கொண்டு, வயலின் வரப்புகளில் செல்லும் போது சடலத்தைச் சுமந்து செல்வர்களும், சடலத்துடன் கீழே விழும் அவதி நிலையினை சந்தித்து வருகின்றனர்.
இக்காரணங்களால் சில சூழ்நிலைகளில் இறப்பவர்களின் உடல்களை வாய்க்கால் ஓர வரப்பிலேயே புதைக்கும் அவல நிலையும் ஏற்பட்டு வருகிறது. இதுகுறித்து ஒவ்வொரு கிராம சபைக் கூட்டத்திலும், அப்பகுதி மக்கள் சார்பில் தீர்மானங்கள் நிறைவேற்றப்பட்ட போதும், எந்த ஒரு நடவடிக்கையும் அரசு அலுவலர்கள் எடுக்கவில்லை என்று புலம்பி வருகின்றனர். எனவே, இது குறித்து மாவட்ட ஆட்சியர் உரிய நடவடிக்கை எடுக்க வேண்டும் எனக் கோரிக்கை வைத்துள்ளனர்.
