யாதவ சங்க கட்டட விவகாரம்.. சார் பதிவாளர் அலுவலகம் முன் தர்ணா!

யாதவ சங்கத்தின் மடத்தின் உரிமையை தங்களுக்கு பதிவு செய்து தரக்கோரி தேர்ந்தெடுக்கப்பட்ட பொதுக்குழு உறுப்பினர்கள் பத்திரப்பதிவு அலுவலகத்தை முற்றுகையிட்டு ஆர்ப்பாட்டத்தில் ஈடுபட்டனர்.

திருவண்ணாமலை செங்கம், தண்டராம்பட்டு மற்றும் கீழ்பெண்ணாத்தூர் ஆகிய பகுதிகளைச் சேர்ந்த யாதவ குல மக்களுக்கு சொந்தமான சுமார் 50 கோடி ரூபாய் மதிப்பிலான மடம் திருவண்ணாமலை திருஊடல் தெருவில் அமைந்துள்ளது. யாதவ குல சங்கத்தின் சார்பில் சங்க உறுப்பினர்கள் மூலம் கடந்த 2022 ஆம் ஆண்டு தேர்தல் வைத்து தலைவர் அறவாழி மற்றும் செயலாளர், பொருளாளர் உள்பட பொதுக்குழு உறுப்பினர்கள் தேர்வு செய்யப்பட்டனர்.

பெரும்பான்மையான நிர்வாகிகள் மூலம் தேர்ந்தெடுக்கப்பட்ட பொறுப்பாளர்களிடம் யாதவ குல சங்கத்தின் 2010 முதல் 2022 வரை பொறுப்பில் இருந்த பழைய நிர்வாகிகள் அதிகாரத்தை ஒப்படைக்காமல் மறுத்து வருவதாகவும், சங்கத்திற்கு சொந்தமான சுமார் 50 கோடி ரூபாய் மதிப்புள்ள திருமண மண்டபத்தை அபகரிக்கும் நோக்கோடு செயல்படுவதாகவும் தற்போது உள்ள தலைவர் அறவாழி குற்றம்சாட்டியுள்ளார்.

மேலும், வழக்கறிஞர் சங்கர் என்பவரின் தூண்டுதலின் பேரில் பழைய நிர்வாகிகள் புதிய நிர்வாகத்திடம் அதிகாரத்தை ஒப்படைக்காமல், பெரும்பான்மை உறுப்பினர்களுடன் தாங்கள் புதிய நிர்வாகிகளை தேர்ந்தெடுத்து உள்ளதாக, போட்டி நிர்வாக குழு தான் உண்மையான குழு என்று கலகத்தை ஏற்படுத்தி வருவதாக அறவாழி தெரிவித்துள்ளார்.

புதிய நிர்வாகிகள் தேர்ந்தெடுக்கப்பட்ட பிறகு, திருவண்ணாமலை திருவூடல் தெருவில் அமைந்துள்ள யாதவ சங்கத்தின் மடத்தின் உரிமையை தங்களுக்கு பதிவு செய்து தரக்கோரி தேர்ந்தெடுக்கப்பட்ட பொதுக்குழு உறுப்பினர்கள் மற்றும் உறுப்பினர்கள் அனைவரும் கையெழுத்து இட்டு இணை சார்பதிவாளர் அலுவலகத்தில் தீர்மானத்தை அளித்தனர்.

தீர்மானத்தை இதுவரை சார்பதிவாளர் வெங்கடேசன் பதிவு செய்யாமல் காலம் தாழ்த்தி வருவதாக குற்றம் சாட்டி இன்று (ஆக.05) யாதவ குல சங்கத்தினர் முன்னூற்றுக்கும் மேற்பட்டோர் ஒன்று திரண்டு இணை சார்பதிவாளர் அலுவலகத்திற்கு ஊர்வலமாக சென்று முற்றுகையிட்டு தர்ணா போராட்டத்தில் ஈடுபட்டனர்.

மேலும், அலுவலகத்துக்கு வந்த இணை சார்பதிவாளர் வெங்கடேசனை முற்றுகையிட்டு உடனடியாக தங்கள் சங்கத்திற்கு யாதவ குல சங்கத்தினை பத்திரப்பதிவு செய்து தர வேண்டும் எனக் கூறி அறவாழி தரப்பினர் முற்றுகை போராட்டத்தில் ஈடுபட்டனர். இதனை அடுத்து அங்கு வந்த காவல் துறையினர், முற்றுகை மற்றும் தர்ணா போராட்டத்தில் ஈடுபட்டிருந்த அறவாழி தலைமையிலான யாதவ குல சங்கத்தினரை கலைத்து அப்புறப்படுத்தினர்.

மேலும், சங்கத்தின் முக்கிய நபர்கள், இணை சார்பதிவாளர் வெங்கடேசன் உடனடியாக பத்திரப்பதிவு செய்து தரக் கோரி கோஷங்களை எழுப்பியதால் அங்கு பெரும் பரபரப்பு ஏற்பட்டது. மேலும் பத்திரப்பதிவு செய்து தராவிட்டால் தாங்கள் இங்கிருந்து கலைந்து போக முடியாது என்றும் முற்றுகையிட்டவர்கள் தெரிவித்தனர்.

இதையும் படிங்க: சென்னையில் நாளை கலைஞர் பன்னாட்டு மராத்தான்: வீரர்களே தயாரா!.....