திருவண்ணாமலை அண்ணா சிலை அருகே குடியுரிமை திருத்தச் சட்டத்தை ஆதரித்து பொதுக்கூட்டம் பாஜக சார்பில் நடைபெற்றது. இதற்கு தெற்கு மாவட்ட பாஜக தலைவர் ஜீவானந்தம் தலைமை தாங்கினார். மாவட்ட பொதுச்செயலாளர் சேகர், மாவட்ட துணைத் தலைவர் காடகமான் முருகன், மாவட்ட செயலாளர் சந்திரசேகர், மகளிரணி தலைவர் பானு நிவேதிதா மற்றும் ஆயிரத்திற்கும் மேற்பட்ட மாவட்ட, ஒன்றிய, நகர, அணி, பிரிவு நிர்வாகிகள், பாஜக தொண்டர்கள் உள்ளிட்டோர் கலந்து கொண்டனர். பாஜக மாநில பொதுச் செயலாளர் கருப்பு முருகானந்தம் சிறப்புரை ஆற்றினார்.
கூட்டத்தில் கருப்பு முருகானந்தம் பேசுகையில், "பாஜகவின் இத்தனை ஆண்டு கால ஆட்சியில் எந்த போராட்டத்தையும் கண்டு அஞ்சியதில்லை, எந்த திட்டத்திலும் பின்வாங்கியது இல்லை. முத்தலாக் தடை சட்டம் கொண்டு வந்த பிறகு இஸ்லாமிய பெண்கள் பட்டாசுகளை வெடித்து கொண்டாடி, அதிக எண்ணிக்கையில் பாஜகவுக்கு ஓட்டளிக்க தொடங்கியுள்ளனர். விசா இல்லாமல் வேறு எந்த நாட்டிற்கும் எதிர்கட்சியினர் சென்றுவிட முடியுமா? என்று கேள்வி எழுப்பினார்.
மேலும், மக்கள் தொகை கணக்கெடுப்பின் மூலம் ஆங்காங்கே இருக்கும் மக்களின் எண்ணிக்கைக்கு ஏற்ப தேவையான விகிதத்தில் திட்டங்களை வகுக்க முடியும். பிரதமர் நரேந்திர மோடி துணிச்சலாக கொண்டுவந்த பணமதிப்பிழப்பு நடவடிக்கைக்குப் பிறகும் பாஜகவுக்கு 352 எம்பிக்கள் கொண்ட மிகப்பெரிய வெற்றியை மக்கள் கொடுத்தார்கள்" இவ்வாறு அவர் பேசினார்.
இறுதியாக கீழ்பென்னாத்தூர் தெற்கு ஒன்றியத் தலைவர் சிவக்குமார் நன்றி உரையாற்றினார்.
இதையும் படிங்க: மாணவர்களை போராட வைப்பது கண்டனத்துக்குரியது - சீனிவாசன் காட்டம்
