குழந்தைகள், முதியவர்களுக்கு விபத்தை ஏற்படுத்தும் பள்ளம்!

திருவண்ணாமலை: சேத்துப்பட்டு சிறப்பு நிலை பேரூராட்சிக்கு உட்பட்ட காயிதேமில்லத் தெருவில் சிறுபாலம் சேதமடைந்து, தெருவின் குறுக்கே ஏற்பட்டுள்ள திடீர் பள்ளத்தால் பொதுமக்கள் அவதியடைந்துள்ளனர்.

திருவண்ணாமலை மாவட்டம் போளூர் அருகே உள்ள சேத்துப்பட்டு சிறப்பு நிலை பேரூராட்சிக்கு உட்பட்டது காயிதேமில்லத் தெரு. இந்த தெருவின் மத்தியில் உள்ள சிறுபாலம் சேதமடைந்து தெருவின் குறுக்கே திடீர் பள்ளம் உருவாகியுள்ளது. இந்தப் பள்ளம் கடந்த 3 ஆண்டுகளுக்கும் மேலாக பேரூராட்சி நிர்வாகம் சரிசெய்யாமல் உள்ளது.

காயிதேமில்லத் தெருவிற்கு அருகே 200 மீட்டர் தொலைவில் சேத்துப்பட்டு அரசினர் மேல்நிலைப்பள்ளி மற்றும் அரசினர் மாணவியர் விடுதி, ஆசிரியர் பயிற்றுநர் அலுவலகம் உள்ளிட்டவைகள் செயல்பட்டு வருகின்றன. இந்தப் பகுதியில் பள்ளி விடுதிக்கு மிதிவண்டிகளில் அல்லது நடந்து செல்லும் மாணவ மாணவிகள், அடிக்கடி பள்ளத்தில் விழுந்து விபத்து ஏற்படுவதாகத் தெரிகிறது.

மேலும் அவசரத்திற்கு 108 ஆம்புலன்ஸ் வாகனங்கள் வரமுடியாத சூழல் உள்ளது. மழை, வெள்ளம் காலங்களில் குழந்தைகள், முதியவர்கள் பள்ளத்தில் மூழ்கி உயிரிழப்பு ஏற்படும் அபாயம் உள்ளது.

இத்தெருவின் சிறுபாலத்தை உடனடியாக சரிசெய்து தரக்கோரி, சிறப்புநிலை பேரூராட்சியிடம் பலமுறை மனுகொடுத்தும் இதுவரை நடவடிக்கை எடுக்கப்படவில்லை என பொது மக்கள் வேதனையுடன் தெரிவித்தனர்.

இதையும் படிங்க: அசுரன்' சாதி வன்மத்தைக் கேள்வி கேட்கும் துணிச்சல்காரன் - ஸ்டாலின்!