அண்ணாமலையார் கோயிலில் அலைமோதிய பக்தர்கள் கூட்டம்!

பொங்கல் விடுமுறை தினமான இன்று திருவண்ணாமலை அண்ணாமலையார் கோயிலில் பக்தர்கள் நீண்ட வரிசையில் நின்று சாமி தரிசனம் செய்தனர்.

திருவண்ணாமலை: பஞ்சபூத தலங்களில் அக்னி தலமாக விளங்குவது திருவண்ணாமலையில் உள்ள அண்ணாமலையார் கோயில். பாடல் பெற்ற தலமான அண்ணாமலையார் கோயில் மீது சமயக்குறவர்களான நால்வரும் தேவாரத் திருபதிகம் பாடியுள்ளனர். சிவனே இங்கு மலையாக இருப்பதாக சைவர்கள் நம்புவதால், இந்த பௌர்ணமி தினங்களில் இங்கு கிரிவலம் வருவது சிறப்பானதாக கருதப்படுகிறது.

இந்த கோயிலில் நடைபெறும் முக்கிய விழாக்களில், மலை மீது மகா தீபம் ஏற்றப்படும் கார்த்திகை தீப திருநாள் சிறப்பாக கொண்டாடப்படும். கடந்தாண்டு கார்த்திகை திருவிழாவின்போது பொதுமுடக்க தளர்வுகள் இருந்தபோதும், பக்தர்கள் அனுமதிக்கப்படவில்லை.

இந்த நிலையில், பொங்கல் பண்டிகையின் விடுமுறை நாளான இன்று (ஜன.17) அண்ணாமலையார் கோயிலில் காலை முதலே பக்தர்களின் வருகை அதிகமாக இருந்தது. கட்டண தரிசனம், இலவச தரிசனம் வரிசைகளில், 2 மணிநேரங்களுக்கு மேலாக காத்திருந்து பக்தர்கள் சாமி தரிசனம் செய்தனர்.

வழக்கமான நாட்களைவிட இன்று பக்தர்களின் வருகை அதிகமாக இருந்ததால் மாடவீதிகளில் போக்குவரத்து நெரிசல் அதிகமாக இருந்தது. இதனால் பக்தர்களும் பொதுமக்களும் சிரமத்துக்குள்ளாகினர்.

இதையும் படிங்க: பொங்கல் பண்டிகையை முன்னிட்டு மாடு பூ தாண்டும் திருவிழா