தமிழ்நாடு முழுவதும் ஏப்ரல் 6ஆம் தேதி சட்டப்பேரவைத் தேர்தல் நடைபெற உள்ளது. இந்தத் தேர்தலில் திருவண்ணாமலை சட்டப்பேரவைத் தொகுதி தேசிய ஜனநாயகக் கூட்டணியில் பாஜகவுக்கு ஒதுக்கப்பட்டது.
திருவண்ணாமலை தொகுதி
கடந்த சில தினங்களுக்கு முன்பு பாஜக தலைமை அலுவலகத்தில், திருவண்ணாமலை சட்டப்பேரவைத் தொகுதியின் தேசிய ஜனநாயகக் கூட்டணியின் பாஜக வேட்பாளராக தணிகைவேல் அறிவிக்கப்பட்டார். அதனைத்தொடர்ந்து திருவண்ணாமலை கோட்டாட்சியர் அலுவலகத்தில் நேற்று (மார்ச் 19) பாஜக வேட்பாளர் தணிகைவேல், தனது வேட்புமனுவினை திருவண்ணாமலை தொகுதி தேர்தல் அலுவலர் வெற்றிவேலிடம் தாக்கல்செய்தார்.
அதனைத்தொடர்ந்து செய்தியாளர்களிடம் பேசிய தணிகைவேல், "திருவண்ணாமலை தொகுதியை நம்பர் ஒன் தொகுதியாக மாற்றுவதே என்னுடைய முதல் பணி. திராவிட முன்னேற்றக் கழகத்தைச் சேர்ந்த எ.வ. வேலு கடந்த 15 ஆண்டு காலமாக திருவண்ணாமலை தொகுதியில் எந்தவித முன்னேற்றத்தையும் ஏற்படுத்தவில்லை.
எந்த ஒரு வளர்ச்சியையும் செய்யவில்லை. நான் சட்டப்பேரவை உறுப்பினராகத் தேர்ந்தெடுக்கப்பட்டால், விரைவில் அனைத்து வளர்ச்சிகளையும் கொண்டுவருவேன்" என்றeர்.
அதனைத்தொடர்ந்து, செய்தியாளர்கள் எட்டு வழிச்சாலை குறித்து எழுப்பிய கேள்விக்கு, வேட்பாளர் உடன்வந்த பாஜகவின் மாநிலப் பொதுச்செயலாளர் கே.டி. ராகவன் குறுக்கிட்டு, 'தற்போது வேட்புமனு தாக்கல்செய்திருக்கிறோம். பின்னர் இது குறித்து பதிலளிப்போம்' என்று தெரிவித்தார்.
தாரை தப்பட்டைகள்
முன்னதாக வேட்புமனு தாக்கல் செய்யவந்த தணிகைவேல், அண்ணாமலையார் கோயில் ராஜகோபுரம் முன்பிருந்து, தாரை தப்பட்டைகள், பொய்க்கால் குதிரை, மயிலாட்டம் ஆகியவற்றுடன் ஊர்வலமாக வந்தார்.
ஊர்வலத்தில் 500-க்கும் மேற்பட்டவர்கள் கலந்துகொண்டனர். இதனால் நகர்ப் பகுதியில் கடும் போக்குவரத்து நெரிசல் ஏற்பட்டது.
