இது தொடர்பாக செய்தியாளர்களைச் சந்தித்த வழக்கறிஞர்கள் கூட்டமைப்பின் தலைமை ஒருங்கிணைப்பாளர் ராம.சேயோன் கூறுகையில்,
நாகப்பட்டினம் மாவட்டம் மயிலாடுதுறை மக்கள் கடந்த 30 ஆண்டுகளாக மயிலாடுதுறையை தலைமையிடமாகக்கொண்டு தனி மாவட்டம் உருவாக்க வேண்டும் என தமிழ்நாடு அரசை வலியுறுத்தி வருகின்றனர். தென்காசி, செங்கல்பட்டு உள்ளிட்ட புதிய மாவட்டங்களை தமிழ்நாடு அரசு நடப்பாண்டில் அறிவித்தது.
ஆனால், மயிலாடுதுறை மக்களின் நீண்டநாள் கோரிக்கை இதுவரை நிறைவேற்றப்படாமல் உள்ளது. மயிலாடுதுறையை தனி மாவட்டமாக அறிவிக்க வலியுறுத்தி பல்வேறு அமைப்புகள் இப்பகுதியில் தொடர்ந்து போராட்டங்கள் நடத்தின.
அந்த வகையில் மயிலாடுதுறை மாவட்டத்துக்கான வழக்கறிஞர் கூட்டமைப்பின் அவசரக் கூட்டத்தில் டிசம்பர் 31ஆம் தேதிக்குள் மயிலாடுதுறையை தலைமையிடமாகக் கொண்டு தனி மாவட்டத்தை அறிவிக்க தமிழ்நாடு அரசு தவறினால், உள்ளாட்சித் தேர்தலை மயிலாடுதுறை உட்கோட்டத்தைச் சேர்ந்த அரசியல் கட்சிகளும், பொதுமக்களும் புறக்கணிக்க வேண்டும் என கோரிக்கை விடுக்கப்பட்டுள்ளது, இவ்வாறு கூறினார்.
