திருவள்ளூர் மாவட்டம் திருவாலங்காடு ஒன்றியத்துக்குட்பட்ட பாகசாலை காலனியில் 150-க்கும் மேற்பட்ட வீடுகளில் பல்வேறு குடும்பத்தினர் வசித்துவருகின்றனர். இந்த வீடுகளுக்கு ஊராட்சி மேல்நிலை நீர்த்தேக்கத் தொட்டியில் ஆழ்துளை கிணறு மூலம் நீர் நிரப்பப்பட்டு குடிநீர் விநியோகிக்கப்படுகிறது.
இந்நிலையில் அந்த குடிநீர் மேல்நிலைத் தொட்டி அருகே அமைக்கப்பட்டிருந்த ஆழ்துளைக் கிணறு பழுதடைந்ததால் அருகில் மயானத்தில் அமைக்கப்பட்டுள்ள ஆழ்துளை கிணறு மூலம் நீர் ஊற்றப்பட்டு குடிநீர் விநியோகம் செய்யப்பட்டது.
ஆனால் கடந்த சில மாதங்களாக அந்த ஆழ்துளை கிணற்றில் நீர் வறண்டு போனதால் குடிநீர் பிரச்னை ஏற்பட்டது. இது குறித்து ஒன்றிய நிர்வாகத்திடம் பலமுறை கோரிக்கை மனு கொடுத்தும் எந்தவித நடவடிக்கையும் எடுக்கப்படவில்லை.
இதனையடுத்து பாகசாலை காலனியைச் சேர்ந்த 50-க்கும் மேற்பட்ட பெண்கள் காலிக்குடங்களுடன் இன்று மாவட்ட ஆட்சியர் அலுவலகத்தை முற்றுகையிட்டு போராட்டம் நடத்தினர். இது குறித்து உரிய நடவடிக்கை எடுப்பதாக மாவட்ட ஆட்சியர் மகேஸ்வரி ரவிக்குமார் உறுதி அளித்த பின் அவர்கள் அனைவரும் கலைந்துசென்றனர்.
