சென்னை மக்களின் குடிநீர் தேவையை நிறைவேற்றும் பிரதான நீர்த்தேக்கங்களில் ஒன்றாக பூண்டி நீர்த்தேக்கம் உள்ளது. இந்த நீர்த்தேக்கத்திற்கு கிருஷ்ணா நதிநீர் பங்கீடு திட்டத்தின் கீழ் செப்டம்பர் 28ஆம் தேதியிலிருந்து ஆந்திர மாநிலம் கண்டலேறு அணையிலிருந்து தண்ணீர் திறக்கப்பட்டு வந்துகொண்டிருக்கிறது.
கண்டலேறு அணையிலிருந்து அதிகபட்சமாக விநாடிக்கு 2800 கனஅடி தண்ணீர் திறந்துவிடப்பட்டது. இந்த நீர் பூண்டிக்கு 800 கனஅடி வீதம் வந்து சேர்ந்தது. கண்டலேறு அணையின் மொத்த கொள்ளளவு 68 டி.எம்.சி ஆகும். இந்த அணைக்கு சோமசீலா அணையிலிருந்து தண்ணீர் திறந்துவிடப்படுவது வழக்கம். சோமசீலா அணையின் நீர் பிடிப்பு பகுதியில் கன மழை பெய்து வருவதால் அணைக்கு தண்ணீர் வரத்து தொடர்ந்து அதிகரித்துள்ளது.
சோமசீலா அணையிலிருந்து நாள் ஒன்றுக்கு அரை டி.எம்.சி. வீதம் கண்டலேறு அணைக்கு தண்ணீர் திறந்து விடப்படுகிறது. இதனால் கண்டலேறு அணையின் நீர்மட்டம் வெகுவாக உயர்ந்துவருகிறது. அணையில் கடந்த செப்டம்பர் மாதம் வெறும் 5 டி.எம்.சி. தண்ணீர் மட்டுமே இருந்த நிலையில் இன்று காலை நிலவரப்படி அணையில் 40 டி.எம்.சி. தண்ணீர் இருப்பு உள்ளது.
இந்நிலையில் நெல்லூர் மாவட்டத்தில் பருவ மழை பெய்யவில்லை. மழை பெய்யும் என்ற நம்பிக்கையில் அங்குள்ள விவசாயிகள் நெல் நடவு செய்திருந்தனர். எனவே நெற்பயிரை காப்பாற்ற கண்டலேறு அணையிலிருந்து பூண்டி ஏரிக்கு தண்ணீர் திறந்து விடப்படும் கிருஷ்ணா நதி கால்வாயில் உள்ள மதகுகளை திறக்க ஆந்திர விவசாயிகள் அம்மாநில அரசை கேட்டுக்கொண்டனர்.
இதற்கு அரசு ஒத்துக்கொண்டதால் கிருஷ்ணா நீரை தங்களது பகுதியில் உள்ள மதகுகளை திறந்து விட்டு ஆந்திர விவசாயிகள் வயலுக்கு பாய்ச்சி வருகின்றனர். இதேபோல் சிறு சிறு ஏரிகளுக்கும் கிருஷ்ணா நதிநீரை திருப்பி உள்ளனர். இதனால் பூண்டிக்கு தண்ணீர் வரத்து வெகுவாக குறைந்துள்ளது.
