திருவள்ளூர் மாவட்டம், ஆவடி அருகேயுள்ள காட்டூரில் தொழிற்பேட்டை உள்ளது. இங்குள்ள கம்பெனி ஒன்றில் உத்தரப்பிரதேச மாநிலத்தைச் சேர்ந்த நயான் (வயது 20) என்பவர் ஊழியராகப் பணிபுரிந்து வருகிறார். டிச.09ஆம் தேதி இரவு நயான் கம்பெனியில் இருந்து இரவு உணவு சாப்பிடுவதற்கு காட்டூர் தொழிற்பேட்டை வழியாக நடந்துச் சென்று கொண்டிருந்தார்.
அப்போது, அவ்வழியாக இருசக்கர வாகனத்தில் வந்த மூவரில், ஒருவர் நயான் கையில் வைத்திருந்த செல்போனை பறித்தார். பின்னர், அவர்கள் மூவரும் இருசக்கர வாகனத்தில் செல்போனுடன் அங்கிருந்து தப்பிச் சென்றனர். இது குறித்து ஆவடி டேங்க் பேக்டரி காவல்நிலையத்தில் நயான் புகார் அளித்தார்.
அதனடிப்படையில், காவல் ஆய்வாளார் நடராஜ் தலைமையிலான காவல் துறையினர் வழக்குப்பதிவு செய்து, அப்பகுதியில் உள்ள சிசிடிவி கேமரா மூலம் இருசக்கர வாகனத்தின் பதிவு எண்ணை கொண்டு செல்போன் பறித்த மூவரையும் தேடி வந்தனர்.
இதனைத் தொடர்ந்து செல்போன் பறிப்பில் ஈடுபட்டது, திருவள்ளூர் அருகேயுள்ள அரண்வாயல், நேரு தெருவைச் சேர்ந்த விஷ்ணு (வயது 19) என்ற கல்லூரி மாணவன் என்பது தெரியவந்தது. இதையடுத்து, தலைமறைவாக இருந்த மாணவன் விஷ்ணுவை காவல் துறையினர் பிடித்து விசாரணை நடத்தினர். அதில், அவருடன் சேர்ந்து நண்பர்களான கார்த்திக், ஸ்ரீநாத் ஆகியோரும் வழிப்பறியில் ஈடுபட்டதை ஒப்புக் கொண்டார்.
பின்னர், அவரிடமிருந்து செல்போன், இருசக்கர வாகனம் ஆகியவற்றை காவல் துறையினர் பறிமுதல் செய்தனர். இதைத் தொடர்ந்து, காவல் துறையினர் விஷ்ணுவை கைது செய்து வேறு ஏதேனும் குற்ற செயலில் ஈடுப்பட்டுள்ளாரா என விசாரணை செய்து வருகின்றனர். மேலும், தலைமறைவாக உள்ள கார்த்திக், ஸ்ரீநாத் ஆகிய இருவரையும் காவல் துறையினர் தேடி வருகின்றனர்.
இதையும் படிங்க: செல்போன் ஏற்றிச்சென்ற லாரியை கடத்திய 6 பேர் கைது
