டன் கணக்கில் ரேஷன் அரிசி கடத்தல்! சுற்றி வளைத்து பிடித்த காவல்துறை!

திருவள்ளூர்: ஆந்திராவிற்கு கடத்த இருந்த ஒன்றரை டன் ரேஷன் அரிசியை பறிமுதல் செய்து சிறிய ரக சரக்கு வாகனத்தை கைப்பற்றி காவல் துறையினர் விசாரணை செய்து வருகின்றனர்.

திருவள்ளூர் மாவட்டம் பழவேற்காடுப் பகுதியில் காவல்துறையினர் வாகன சோதனையில் ஈடுபட்டுக் கொண்டிருந்தனர். அப்போது அவ்வழியாக வந்த சிறிய ரக சரக்கு வாகனத்தை நிறுத்துமாறு காவல்துறையினர் சைகை காட்டியபோது அதன் ஓட்டுநர் வாகனத்தை நிறுத்திவிட்டு அங்கிருந்து தப்பி ஓட்டம் பிடித்துள்ளார்.

இதனையடுத்து வாகனத்தை சோதனையிட்டபோது அதில் ஒன்றரை டன் ரேஷன் அரிசி இருப்பது தெரியவந்தது. இந்த ரேஷன் அரிசி படகு மூலம் ஆந்திராவிற்கு கடத்துவதற்காக கொண்டுவரப்பட்டு இருக்கலாம் என திருப்பாலைவனம் காவல்துறையினர் வழக்குப் பதிவு செய்து விசாரணை மேற்கொண்டு வருகின்றனர்.

தமிழ்நாட்டில் இருந்து அண்டை மாநிலங்களுக்கு ரேஷன் பொருட்கள் கடத்தப்படுவது வாடிக்கையாகிபோனது வேதனையளிப்பதாக பொதுமக்கள் தெரிவித்துள்ளனர்.