நவீன யுகத்தில் இந்தியா எத்தனையோ வகையில் முன்னேறியிருந்தாலும், இங்கு பின்னிக் கிடக்கும் சாதிய வலையின் முடிச்சுகள் மட்டும் இன்னும் அவிழ்க்கவேபடவில்லை. திருவள்ளூர் மாவட்டம், ஆத்துப்பாக்கம் பஞ்சாயத்து தலைவர் அமிர்தம். இவர் பட்டியலின வகுப்பை சேர்ந்தவர் என்பதாலேயே அடுத்தடுத்து ஒடுக்கப்பட்டுள்ளார்.
இவரை 74 ஆவது சுதந்திர தினம் அன்று கொடியேற்று விழாவிற்கு அருகில் உள்ள பள்ளியில் அழைத்துள்ளனர். ஆனால், அதன் பின்னர் வரவேண்டாம் என கூறியுள்ளனர். இதே போல குடியரசு தினத்தன்று கொடியேற்ற சென்றபோதும், முன்னாள் தலைவர் ஹரிதாஸ் என்பவர் தடுத்ததாகக் கூறப்படுகிறது. அதோடு இவர் பஞ்சாயத்து தலைவர் அமிர்தத்தைத் திட்டியதாகவும் கூறப்படுகிறது.
பட்டியல் இனத்தவர் என்பதால் அமிர்தத்தை கொடியேற்ற விடாத சம்பவம் தொடர்பாக, தமிழ்நாடு மாநில மனித உரிமை ஆணையம் தாமாக முன்வந்து வழக்கை விசாரணைக்கு எடுத்துள்ளது. ஆணைய பொறுப்பு தலைவர் ஜெயச்சந்திரன் எடுத்துள்ள இவ்வழக்கில் மூன்று வாரத்தில் ஊரக வளர்ச்சி துறை இயக்குனர், திருவள்ளூர் மாவட்ட ஆட்சியர், எஸ்.பி. ஆகியோர் அறிக்கை தாக்கல் செய்ய உத்தரவிட்டுள்ளார்.
முன்னாள் தலைவர் ஹரிதாஸ், துணை தலைவர், பஞ்சாயத்து அலுவலகச் செயலாளர் சசிக்குமார் ஆகியோர் மீது என்னென்ன நடவடிக்கைகள் எடுக்கப்பட்டன என்றும் அறிக்கை தாக்கல் செய்ய உத்தரவிட்டுள்ளனர்.
இதையும் படிங்க: விளையாட்டில் விபரீதம்: 3 பேர் தாக்கியதில் பட்டியலின இளைஞர் உயிரிழப்பு!
