திருவள்ளூர் மாவட்ட அரசு தலைமை மருத்துவமனையில் காங்கிரஸ் எம்பி ஜெயக்குமார் ஆய்வு மேற்கொண்டார். அப்போது, கோவாக்சின் தடுப்பூசி போடுவது குறித்தும், கரோனா நோயாளிகளை மருத்துவர்கள் கையாளும் முறை குறித்து அரசு மருத்துவமனை மற்றும் மருத்துவ கல்லூரி முதல்வர் அரசி ஸ்ரீவத்சவாவிடம் கேட்டறிந்தார்.
இதை தொடர்ந்து அவர் செய்தியாளர்களிடம் கூறும்போது, திருவள்ளூர் மாவட்ட அரசு தலைமை மருத்துவமனையில் கோவாக்சின் தடுப்பூசி போடுவது குறித்து ஆய்வு மேற்கொண்டேன் ஆய்வில் அனைத்தும் திருப்திகரமாக உள்ளது.
திரைப்பட நடிகர் விவேக் இறந்தது துரதிர்ஷ்டவசமானது. அதே நேரத்தில் தடுப்பு ஊசி போட்டதால்தான் அவர் உயிரிழந்தார் என தகவல் பரப்பப்படுகிறது. அது உண்மையல்ல, இருந்தாலும் லட்சத்தில் ஒருவருக்கு அது போன்ற பாதிப்புகள் ஏற்படலாம் என கூறப்படுகிறது. தினசரி இந்த மருத்துவமனையில் 500 நபர்களுக்கு தடுப்பூசி போட்டு வந்த நிலையில், திரைப்பட நடிகர் விவேக்கின் மறைவுக்குப் பின்னர் தடுப்பூசி போடுவது 200ஆக குறைந்துள்ளது. மக்களிடம் தேவையில்லாமல் எழுந்துள்ள அச்சத்தைப் போக்க வேண்டும்.
இந்த அரசு மருத்துவமனையில் மொத்தம் 350 படுக்கைகள் உள்ளன. அதில் தற்போது 125 படுகைகள் மட்டுமே பயன்படுத்தப்படுகிறது. அதேபோல் ஆக்சிஜன் 8,000 கிலோ லிட்டர் இருப்பு உள்ளது. தடுப்பூசியும் போதுமான அளவு இருப்பு உள்ளது.
மாவட்ட அரசு தலைமை மருத்துவமனை தவிர அம்பேத்கர் சட்டக்கல்லூரி, பனிமலர் கல்லூரி, ஏசிஎஸ் மருத்துவக் கல்லூரி ஆகிய இடங்களிலும் அவசரத் தேவைக்கு நோயாளிகளுக்கு தேவையான அளவு படுக்கைகள் ஏற்பாடு செய்யப்பட்டுள்ளன. இதனால் மக்கள் விழிப்புடன் செயல்பட்டு தங்களை பாதுகாத்துக் கொள்ள வேண்டும் என்றார்.
இந்த ஆய்வின்போது அரசு பொது மருத்துவமனையின் மருத்துவர்கள் மற்றும் அரசு அலுவலர்கள், காங்கிரஸ் கட்சியின் மாவட்ட பொதுச் செயலாளர் வழக்கறிஞர் ஜான் உள்ளிட்டோர் உடன் இருந்தனர்.
இதையும் படிங்க: ஆதரவற்ற மக்களுக்காக தொடங்கப்பட்ட "காவல் கரங்கள்"
