திருநெல்வேலி: நெல்லை மாவட்டம் கூடங்குளம் அணுமின் நிலையத்தில், இரண்டு அணு உலைகளின் மூலம் தலா ஆயிரம் மெகாவாட் மின் உற்பத்தி தற்பொழுது நடைபெற்று வருகிறது. இந்நிலையில் மேலும் 4 அணு உலைகள் அமைக்கும் பணியானது நடைபெற்று வருகிறது.
அதில் 2 அணு உலைகளுக்கு தேவையான "ஸ்டீம் ஜெனரேட்டர்" எனப்படும் நீராவி உற்பத்தி செய்யும் இயந்திரம் ரஷ்யாவில் இருந்து கடல் மார்க்கமாக தூத்துக்குடி துறைமுகத்திற்கு கடந்த ஒன்றை மாதத்திற்கு முன் வந்தடைந்தது. இதனையடுத்து நேற்று (செப். 9) தூத்துக்குடி துறைமுகத்தில் இருந்து 600 டன் எடை உள்ள இரண்டு ஸ்டீம் ஜெனரேட்டர்கள் மிதவை கப்பல் மூலம் கூடங்குளம் அணுமின் நிலையத்தில் உள்ள துறைமுகத்திற்கு இழுத்துவரப்பட்டது.
அப்போது எதிர்பாரத விதமாக பாறை இடுக்கில் சிக்கி மிதவை கப்பலுடன் இணைந்து இருந்த கயிறு அறுந்து விட்டதாக கூறப்படுகிறது. மிதவைக் கப்பல் ஆனது 55 மீட்டர் நீளமும் 18 மீட்டர் அகலமும் கொண்டது. எனவே அகலமான இந்த மிதவை கப்பல் பாறை இடுக்கில் சிக்கியதினால் அதனை மீண்டும் இழுப்பதில் சிக்கல் ஏற்பட்டது. மேலும் கடலின் நீர்மட்டம் குறைந்ததினால் மிதவை கப்பல் ஒருபுறம் சாய்ந்த நிலையில் உள்ளது. இதனை சரி செய்யும் பணியில் ஒப்பந்ததாரர்கள், முத்துக்குளி வீரர்கள், மற்றும் அப்பகுதி மீனவர்கள் ஈடுபட்டு வந்தனர்.
அணுமின் நிலையத்தின், துறைமுக பகுதியில் இருந்து சுமார் ஒரு கிலோ மீட்டர் தொலைவிற்குள் பாறை இடுக்குகளில் சிக்கியுள்ள அந்த மிதவையானது கடலின் நீர்மட்டத்தின் உயர்வு மற்றும் காற்றின் வேகத்தை பொறுத்து மீண்டும் அது கூடங்குளம் துறைமுகத்திற்கு கொண்டுவரப்படும் என எதிர்பார்க்கப்படுகிறது.
ஆனால் நேற்று (செப். 9) மாலை வரை கடலில் நீர்மட்டம் போதிய அளவு உயராததாலும், கடலில் காற்றின் வேகம் அதிகமாக இருந்ததினாலும் பணிகள் அனைத்தும் நிறுத்தப்பட்டுள்ளன. இதனையடுத்து இதற்கான வல்லுநர்கள் குழு வரவழைக்கபட்டு இன்று (செப். 10) காலை மீண்டும் இழுவை கப்பலை மீட்கும் பணியை தொடங்கி உள்ளனர்.
ஏற்கனவே உக்கரைன் ரஷ்ய போரினால் கூடங்குளம் அணுமின் நிலையத்திற்கு வர வேண்டிய உதிரி பாகங்கள் மிகவும் காலம் தாமதமாகவே வந்து கொண்டிருக்கின்ற சூழ்நிலையில். தற்பொழுது தூத்துக்குடி துறைமுகத்தில் இருந்து இழுவை கப்பலில் வந்த ஸ்டீம் ஜெனரேட்டர் எனப்படும் நீராவிய உற்பத்தி செய்யும் இயந்திரங்கள் பாறை இடுக்குகளில் சிக்கி உள்ளது பின்னடைவை ஏற்படுத்தி உள்ளது.
இதையும் படிங்க: சுத்தமாக இருக்க வேண்டிய பள்ளியின் சுற்றுப்புறத்துக்கே இந்த நிலையா..? - ஆதங்கத்தில் கிராம மக்கள்!
