திருநெல்வேலி மாவட்டம் நாங்குநேரி தொகுதி இடைத்தேர்தல் வருகின்ற 21ஆம் தேதி நடைபெறகிறது. இந்நிலையில் இன்று நாங்குநேரி தொகுதிக்குள்பட்ட பகுதிகளான முன்னீர்பள்ளம், தருவை, செங்குளம் ஆகிய பகுதிகளில் திமுக தலைவர் ஸ்டாலின் இடைத்தேர்தலில் போட்டியிடும் காங்கிரஸ் வேட்பாளர் ரூபி மனோகரனை ஆதரித்து வாக்குகள் சேகரித்தார்.
அப்போது அவர் பேசுகையில், "வரும் இடைத்தேர்தலில் வெற்றியைத் தேடி தருவீர்கள் என நம்புகிறேன். தமிழ்நாடே தண்ணீர் இல்லாமல் குடத்தை தூக்கிக்கொண்டு சாலைக்கு வரும் நிலையில் உள்ளது. திமுக ஆட்சியில் குடிநீர், சாலை உள்ளிட்ட பல மக்கள் நலத் திட்டங்கள் நிறைவேற்றப்பட்டன.
உள்ளாட்சித் தேர்தல் நடத்தப்படாததால் உள்ளாட்சிப் பிரதிநிதிகள் இல்லாமல் மக்கள் பிச்னைகளை தீர்க்க முடியவில்லை. மக்கள் குறைகளைக் கேட்டு சரிசெய்ய வேண்டி ஆளுங்கட்சி எட்டு ஆண்டுகளாக செயல்படாமல் உள்ளது.
அமைச்சர்களிடம் மேடையில் நேரடியாக நலத்திட்டங்களை பெற முடியாவிட்டால், சம்திங் கொடுத்தால்தான் அந்த உதவிகளைப் பெறமுடியும். குளத்தை தூர்வாருகிறோம் என்ற பெயரில் கொள்ளை நடந்துவருகிறது.
உள்ளாட்சித் தேர்தல் நடத்தினால் தோல்வியடைந்து விடுவோம் என்ற பயத்தினால் அந்தத் தேர்தலை அதிமுக தவிர்க்கிறது. ஆனால் அவர்கள் திமுக வழக்கு தொடர்ந்ததால் தேர்தல் நடத்த முடியவில்லை என சாக்கு போக்கு சொல்லுகின்றனர். திமுக ஆட்சிக்கு வந்தவுடன் உள்ளாட்சித் தேர்தல் நடத்தப்படும். ஆளும் கட்சி சட்டப்பேரவை உறுப்பினர்கள் ராஜினாமா செய்துவிடுவேன், கட்சி மாறி விடுவேன் என மிரட்டி தங்களின் ஆட்சியாளர்களிடம் பணம் பெறுகின்றார்கள்.
விவசாயிகள் கோரிக்கைகளை நிறைவேற்ற வலியுறுத்தி பல போராட்டங்களை நடத்தியும் பலனில்லை. மக்கள் நல்வாழ்வுத் துறையிலும் ஆயிரக்கணக்காக ஊழல் நடக்கிறது. குட்கா போதைப்பொருள் விற்க அலுவலர்களுக்கு மாமூல் கொடுத்து விற்பனை செய்துவருகிறார்கள். மக்கள் நல்வாழ்வுத் துறை அமைச்சருக்கும் மாமூல் கொடுத்த உண்மை வெளியாகியுள்ளது.
மத்திய அரசின் உத்தரவிற்கு கூனிக்குறுகி அடிபணியும் ஆட்சி நடைபெறுகிறது. இந்த ஆட்சிக்கு பாடம் புகட்டும் அளவில் இந்த நாங்குநேரி இடைத்தேர்தல் முடிவு இருக்க வேண்டும் இருக்கும் என நம்புகிறேன்" என்று தெரிவித்தார்.
இறுதியாக காங்கிரஸ் வேட்பாளர் ரூபி மனோகரன் ராணுவத்தில் பணிபுரிந்தவர். எனவே நாட்டை பாதுகாக்க பணியாற்றியவருக்கு தொகுதி மக்களுக்காக பணியாற்ற வாய்ப்பு அளிக்க வேண்டும் என்றும் கேட்டுக்கொண்டார்.
