திருநெல்வேலி: திசையன்விளை மணலிவிளையைச் சேர்ந்தவர், சிவா. வழக்கறிஞரான இவர், திசையன்விளை மெயின் ரோட்டில் இருக்கும் கனரா வங்கி அருகில் உள்ள கட்டடத்தில் சொந்தமாக ஹார்டுவேர்ஸ் கடை நடத்தி வருகிறார். இந்த நிலையில் நேற்று (பிப்.14) இரவு சிவா, கடையை அடைத்து விட்டு ஷட்டருக்கு பூட்டு போட்டுக் கொண்டிருந்தார். அப்போது அங்கு வந்த இரண்டு மர்ம நபர்கள், அவரது தலையில் இரும்பு கம்பியால் அடித்துள்ளனர்.
இதனையடுத்து சுதாரித்துக் கொண்ட சிவா, அங்கிருந்து தப்பிக்க முயன்று சாலையில் வேகமாக ஓடியுள்ளார். அதேநேரம் அவரை தாக்கிய நபர்களில் ஒருவரும் கையில் அரிவாளுடன் அவரைப் பின் தொடர்ந்து வெட்டுவதற்கு துரத்தியுள்ளார். பின்னர், திசையன்விளை கூட்டுறவு வங்கி எதிர்புறம் உள்ள மளிகை கடை ஒன்றில் தஞ்சம் புகுந்த சிவாவை, மர்ம நபர் அரிவாளால் ஓங்கி தலையில் வெட்ட முயன்றுள்ளார்.
அதை சிவா தனது இடது கையால் தடுக்க முயன்றுள்ளார். இதனால் சிவாவின் இடது கை மணிக்கட்டு துண்டாகி தொங்கிய நிலையில் இருந்தது. தொடர்ந்து சிவா உடனே மளிகை கடையின் உட்புறம் தஞ்சம் புகுந்துள்ளார். அப்போது அரிவாளுடன் வந்த நபர் கடையின் உள்ளே சென்றும் சிவாவை வெட்ட முயன்றுள்ளார்.
அப்போது அருகில் உள்ள மற்றொரு மளிகை கடை இளைஞர்கள் மற்றும் பொதுமக்கள் கூடி கைகளில் கிடைத்த செங்கல் மற்றும் கம்புகளை கொண்டு மர்ம நபரை அரிவாளை கீழே போடச் சொல்லி வலியுறுத்தி உள்ளனர். அப்போது கையில் அரிவாளுடன் வந்த மர்ம நபர், தனது தாத்தாவின் சொத்தை கள்ளத்தனமாக பத்திரம் போட்டு ஹார்டுவேர்ஸ் உரிமையாளர் அபகரித்துக் கொண்டதாக ஆவேசமாக கத்தி உள்ளார்.
மேலும் அரிவாளை கீழே போடச் சொல்லிய பொதுமக்களிடம், கம்பையும் கல்லையும் கீழே போட்டால்தான் அரிவாளை கீழே போடுவேன் என மர்ம நபர் கூறியுள்ளார். உடனடியாக சுற்றி இருந்த பொதுமக்கள் கையில் வைத்திருந்த செங்கல் மற்றும் கம்புகளை கீழே போட்டுள்ளனர். இதனையடுத்து மர்ம நபரும் தன்னுடைய அரிவாளை கீழே போட்டுள்ளார்.
இதனிடையே சம்பவ இடத்துக்கு வந்த காவலர் ஒருவர், மர்ம நபரை பிடித்துள்ளார். அப்போது மீண்டும் அந்த மர்ம நபர் அரிவாளை வைத்து தாக்க முயன்றதால், அங்கிருந்த பொதுமக்கள் மர்ம நபரை தாக்க முற்பட்டனர். உடனே காவல் துறையினர் அவரை அந்த இடத்தில் இருந்து அப்புறப்படுத்தி காவல் நிலையம் கொண்டு சென்றனர்.
மர்ம நபரோடு வந்த மற்றொருவர் முதியவர் என்பதால், பஜாரை நோக்கி தப்பிச் செல்ல முயன்றுள்ளார். ஆனால், அவரையும் பொதுமக்கள் பிடித்து காவல் துறையிடம் ஒப்படைத்துள்ளனர். இதனையடுத்து இருவரிடமும் காவல் துறையினர் நடத்திய விசாரணையில், அரிவாளுடன் இளைஞரை துரத்திய மர்ம நபர் தூத்துக்குடி மாவட்டம் இடைச்சிவிளையைச் சேர்ந்தவர் என்பது தெரிய வந்துள்ளது.
அவரது தாத்தாவின் சொத்தான, ஹார்டுவேர்ஸ் உரிமையாளர் தற்போது கடை நடத்தி வரும் கட்டட வழக்கின் தீர்ப்பு, சிவாவின் தந்தை ராமக்கனிக்கு சாதகமாக வந்துள்ளது. எனவே தங்களது சொத்தை கள்ளத்தனமாக பத்திரம் போட்டு ராமக்கனி அபகரித்துக் கொண்டதாக, ராமக்கனி மீது தாக்குதல் நடத்த மர்ம நபர் திட்டமிட்டுள்ளார்.
ஆனால், அப்போது ராமக்கனி இல்லாததால் அவரது மகன் சிவாவை கொலை செய்ய முயன்றுள்ளார்’ என முதற்கட்ட விசாரணையில் தெரிய வந்துள்ளது. தொடர்ந்து இருவரையும் கைது செய்து வழக்குப் பதிவு செய்த காவல் துறையினர், இதுதொடர்பாக தீவிர விசாரணை மேற்கொண்டு வருகின்றனர்.
இதையும் படிங்க: திருடப்போன இடத்தில் களைப்பில் தூங்கிய நபர்.. காலையில் காத்திருந்த அதிர்ச்சி!
