நெல்லை மாவட்டத்திலிருந்து தென்காசி பிரிக்கப்பட்டு தனி மாவட்டமாக அறிவிக்கப்பட்டது. அதையடுத்து மாவட்டத்திற்கான எல்லைகள் பிரிப்பது, அரசு தலைமை இடங்கள் எங்கு அமைப்பது என்பன உள்ளிட்ட பணிகளை மேற்கொள்ள தனி அலுவலர் நியமிக்கப்பட்டு அதற்கான பணிகள் நடந்துவருகின்றன.
தென்காசி தனி மாவட்டமாக அறிவிக்கப்பட்ட நிலையில் சங்கரன்கோவிலை தலைமையிடமாகக் கொண்டு தனி மாவட்டம் பிரிக்க வேண்டும் என அப்பகுதி மக்களிடையே கோரிக்கை எழுந்தது.
அதேபோல் மாவட்ட நிர்வாகத்தின் சார்பில் நடத்தப்பட்ட கருத்துக் கேட்பு கூட்டத்திலும் இந்த கோரிக்கை வலியுறுத்தப்பட்டது. தொடர்ந்து சங்கரன்கோவிலை தலைமையிடமாகக் கொண்டு திருவேங்கடம் , கரிவலம்வந்தநல்லூர், சிவகிரி, தேவர்குளம், வன்னிகோனந்தல் உள்ளிட்ட பகுதிகளை உள்ளடக்கி மாவட்டம் பிரிக்க வலியுறுத்தி அரசின் கவனத்தை ஈர்க்கும் வகையில் நேற்று சங்கரன்கோவிலில் பொது வேலைநிறுத்தப்போராட்டம் நடத்தப்பட்டு பேரணியாக சென்று வட்டாட்சியரிடமும் பொதுமக்கள் மனு அளித்தனர் .
இந்நிலையில் இன்று சங்கரன்கோவில் மாவட்டத்தின் கோரிக்கை இயக்கம் ஒருங்கிணைப்புக் குழு சார்பாக திமுக முன்னாள் அமைச்சர் தங்கவேலு தலைமையில், மாவட்ட ஆட்சியர் ஷில்பா பிரபாகர் சதீஷை சந்தித்து சங்கரன்கோவிலை தனி மாவட்டமாக பிரிக்க வேண்டும் என்ற கோரிக்கை மனு அளிக்கப்பட்டது.
இதுகுறித்து திமுக முன்னாள் அமைச்சர் தங்கவேலு பேசுகையில், ”வேலூர் எப்படி மூன்று மாவட்டமாக பிரிக்கப்பட்டுள்ளதோ அதேபோல் சங்கரன்கோவிலையும் பிரிக்க வேண்டும். தனி மாவட்டமாக அறிவிப்பதற்கான அனைத்து வசதிகளும் சங்கரன்கோவிலில் உள்ளது. தொடர்ந்து சென்னையில் உள்ள முக்கிய அரசியல் கட்சி தலைவர்களிடம் இதுதொடர்பாக கோரிக்கை மனு அளிப்போம்” என்றார்.
