மாணவிகள் விடுதிக்குள் புகும் தெரியாத நபர்கள்; நடவடிக்கை எடுக்கக்கோரி போராட்டம்

அரசு சித்த மருத்துவ கல்லூரி மாணவிகள் விடுதிக்குள் தெரியாத நபர்கள் புகுந்தது குறித்து புகார் அளித்தும் நடவடிக்கை எடுக்காததால் மாணவ, மாணவிகள் போராட்டத்தில் ஈடுபட்டனர்

நெல்லை அரசு சித்த மருத்துவ கல்லூரியில் 500க்கும் மேற்பட்ட மாணவ, மாணவிகள் படித்து வருகின்றனர். இந்த கல்லூரி தமிழகத்தில் முதல் அரசின் சித்த மருத்துவக்கல்லூரி ஆக தொடங்கப்பட்டு மருத்துவமனையுடன் செயல்பட்டு வருகிறது. இங்கு படிக்கும் மாணவர்களுக்கான விடுதி கடந்த சில ஆண்டுகளுக்கு முன்னர்
சிதிலமடைந்ததன் காரணமாக மூடப்பட்டது.

இதேபோல் மாணவிகளுக்கான விடுதி ஒன்று கல்லூரி வளாகத்தில் செயல்பட்டு வருகிறது. இங்கு சுமார் 150க்கும் மேற்பட்ட மாணவிகள் தங்கிப் படித்து வருகின்றனர். இந்த விடுதியில் மேற்கூரை அவ்வப்போது இடிந்து விடுவதாகவும் விடுதியில் உள்ள உணவு சுகாதாரமற்ற நிலையில் இருப்பதாகவும் கூறி, தொடர்ந்து மாணவிகள் தரப்பில் மருத்துவ கல்லூரி நிர்வாகத்திடம் புகார் அளிக்கப்பட்டு வருகிறது.

இந்நிலையில் கடந்த சில தினங்களுக்கு முன்னர், கல்லூரி மாணவி விடுதிக்குள் மர்ம நபர் ஒருவர் புகுந்து மாணவிகளிடம் தவறாக நடந்து கொண்டதாக கூறப்படுகிறது. இதனைத்தொடர்ந்து கல்லூரி நிர்வாகத்திடம் விடுதியில் உள்ள மாணவிகள் புகார் அளித்துள்ளனர். ஆனால், இதுவரை எந்த நடவடிக்கையும் எடுக்கவில்லை என வலியுறுத்தி 300க்கும் மேற்பட்ட மாணவ, மாணவிகள் கல்லூரி முதல்வர் அலுவலகத்திற்கு முன்பு தர்ணா போராட்டத்தில் ஈடுபட்டதால் பரபரப்பு ஏற்பட்டது.

இதனைத்தொடர்ந்து கல்லூரி முதல்வர் சாந்த மரியா மாணவிகளுடன் பேச்சுவார்த்தை நடத்தி, தற்காலிகமாகத் தீர்வு காண நடவடிக்கை எடுக்கப்படும் எனத் தெரிவித்தார். ஆனால், இதனை ஏற்க மறுத்த மாணவ, மாணவிகள் சித்த மருத்துவ இயக்குநர் மற்றும் அரசு துறை உயர் அலுவலர்கள் நேரடியாக தங்களிடம் பேச்சுவார்த்தை நடத்தி நிரந்தரத் தீர்வுக்கு ஏற்பாடு செய்தால் மட்டுமே போராட்டத்தை கைவிடப்போவதாக அறிவித்து தொடர் போராட்டத்தில் ஈடுபட்டு வருகின்றனர்.

மர்ம நபர்கள் விடுதிக்குள் புகுந்த சம்பவம் தொடர்பாக போலீசில் புகார் அளிக்கப்பட்டுள்ள நிலையில், மாணவிகளிடம் காவல் துறையினர் நேரடியாக பேச்சுவார்த்தை நடத்தி உரிய பாதுகாப்பு வழங்க நடவடிக்கை எடுக்கப்படும் என்றும்; மேலும் சிசிடிவி கேமராக்கள் மற்றும் விடுதி காப்பாளர்கள் மற்றும் காவலர்களை கூடுதலாக நியமித்து நடவடிக்கை எடுக்க மருத்துவக் கல்லூரி நிர்வாகத்துடன் பேச்சுவார்த்தை நடத்தி உள்ளதாகவும் தெரிவித்தனர்.

தொடர்ந்து மாணவிகளிடம் கல்லூரி நிர்வாகம் சார்பில் பேச்சுவார்த்தையும் நடத்தப்பட்டு வருகிறது.

இதையும் படிங்க: நெல்லையில் நடிகர் வீட்டிலிருந்த பழங்கால உலோக சிலைகள் மீட்பு...