திருநெல்வேலி மாவட்டம், அம்பை அடுத்த பாபநாசம் அருகே இருக்கும் மேற்குத்தொடர்ச்சி மலையில் பிரசித்திபெற்ற காரையார் சொரிமுத்து அய்யனார் கோயில் அமைந்துள்ளது. இக்கோயில் சபரிமலை ஐயப்பன் கோயிலின் மூலஸ்தனமாகவும் விளங்குகிறது. இந்த கோயிலில் ஒவ்வொரு ஆண்டும் ஆடி அமாவசை திருவிழாவின்போது, பல்வேறு பகுதிகளில் இருந்தும் லட்சக்கணக்கான பக்தர்கள் வருகை தந்து, குடிசைகள் அமைத்து தங்கி, தரிசனம் செய்து செல்கின்றனர்.
ஆனால், கடந்த இரண்டு ஆண்டுகளாக கரோனா காரணமாக பக்தர்களுக்கு அனுமதி மறுக்கப்பட்ட நிலையில் தற்போது ஆடி அமாவாசை திருவிழாவிற்கு பக்தர்களுக்கு அனுமதி வழங்கப்பட்டுள்ளது. இதனால் சுமார் மூன்று லட்சத்திற்கும் மேல் பக்தர்கள் வருகை தருவார்கள் என எதிர்பார்க்கப்படுகிறது.
இந்நிலையில் திருவிழாவிற்கான முன்னேற்பாடுகள் குறித்து சேரன்மகாதேவி சார் ஆட்சியர் ரிஷப், அம்பை கோட்ட வனத்துறை துணை இயக்குநர் செண்பக பிரியா, அம்பை டிஎஸ்பி பிரான்சிஸ் மற்றும் வருவாய்த்துறை வனத்துறை, காவல்துறை அலுவலர்கள் காரையார் சொரிமுத்து அய்யனார் கோயிலில் குடிசைகள் அமைப்பது மற்றும் பக்தர்களுக்கு பாதுகாப்பு வழங்குவது குறித்து ஆய்வு மேற்கொண்டனர்.
முன்னதாக சேரன்மகாதேவி சார் ஆட்சியர் ரிஷப் தலைமையில் வனத்துறை, காவல்துறையினர் கூட்டாக செய்தியாளர்களைச் சந்தித்தனர். அப்போது, “வருகிற 26ஆம் தேதி முதல் 30ஆம் தேதி வரை சொரிமுத்து அய்யனார் கோயிலுக்கு வருகை தரும் பக்தர்கள், காலை 6 மணி முதல் மாலை 9 வரை அரசுப்பேருந்துகளில் மட்டும் அனுமதிக்கப்படுவார்கள்.
தனியார் வாகனங்களுக்கு அனுமதியில்லை. ஒரு நாளைக்கு 120 அரசுப்பேருந்துகள் இயக்கப்பட உள்ளது. பிளாஸ்டிக், மது, புகையிலைப் பொருட்கள் அனைத்தும் தடை செய்யப்பட்டுள்ளது. கட்டாயம் முகக்கவசம் அணிந்து வர வேண்டும்.
ஏடிஎஸ்பி தலைமையில் 5 டிஎஸ்பி, 15 இன்ஸ்பெக்டர்கள், 545 காவலர்கள் மற்றும் தூத்துக்குடி, கன்னியாகுமரி, களக்காடு மற்றும் அம்பை வனக்கோட்டங்களில் இருந்து 250 வனத்துறையினர் மற்றும் சில தன்னார்வ அமைப்புகளும் இணைந்து பாதுகாப்புப் பணியில் ஈடுபடவுள்ளனர்” எனத் தெரிவித்தனர்.
இதையும் படிங்க: Video:500 ஆண்டுகள் பழமை வாய்ந்த கௌமாரியம்மன் கோவில் திருவிழா கொண்டாட்டம்
