திருநெல்வேலி: மனோன்மணியம் சுந்தரனார் பல்கலைக்கழகத்தில் கல்வி சார்ந்த நிலைக்குழு கூட்டம் இன்று நடைபெற்றது. இதில் திருத்தப்பட்ட பாடத்திட்டங்கள் மற்றும் புதிய துறைகளுக்கான பாடத்திட்டங்களுக்கும் ஒப்புதல் வழங்கப்பட்டது. இந்தக் கூட்டத்தில் துறை சார்ந்த பேராசிரியர்கள், அலுவலர்கள் கலந்துகொண்டனர்.
நிலைக்குழுவில் சுமார் நூறு உறுப்பினர்கள் உள்ள நிலையில் இன்று நடைபெற்ற கூட்டத்தில் சுமார் 50 முதல் 60 பேர் மட்டுமே பங்கேற்றனர். இதற்கிடையில் நிலைக்குழு கூட்டத்தில் பாடத்திட்டங்கள் குறித்த சந்தேகங்களுக்கு பேசுவதற்கு பேராசிரியர்களுக்கு வாய்ப்பளிக்காமல் அவசர அவசரமாக கூட்டம் முடிக்கப்பட்டதாக புகார் எழுந்துள்ளது.
அதாவது வழக்கமாக இது போன்று நிலைக்குழு கூட்டம் மூன்று மணி நேரம் வரை நடைபெறும் என்று கூறப்படுகிறது. ஆனால், இன்று அரை மணி நேரத்தில் கூட்டம் முடிவு பெற்றது. அதேபோல், வழக்கமாக நிலைக் குழு கூட்டத்தில் பாடத்திட்டங்கள் குறித்து துறைவாரியாக பேராசிரியர்கள் பேசுவதற்கு அனுமதி வழங்கப்படும் என்றும், இன்று நடைபெற்ற கூட்டத்தில் அந்த அனுமதி வழங்கப்படவில்லை என்றும் பேராசிரியர்கள் குற்றம் சாட்டியுள்ளனர்.
அதேபோல், தமிழக அரசின் உயர் கல்வித்துறை தயாரித்துள்ள பாடத்திட்டத்தை பல்கலைக்கழகங்களில் அமல்படுத்துவது தொடர்பான முன்வடிவுக்கும் ஒப்புதல் பெறப்பட்டது. அதே சமயம், உயர் கல்வித்துறை தயாரித்துள்ள பாடத்திட்டத்தில் பல்வேறு முரண்பாடுகள் இருப்பதாகவும், எனவே அந்த பாடத்திட்டத்தை பாடத்திட்ட நிர்ணயக் குழு நிராகரித்ததாகவும் கூறப்படுகிறது.
எனவே, நிராகரிக்கப்பட்ட பாடத்திட்டத்தை நிலைக்குழு கூட்டத்தில் அங்கீகரித்தது ஏன் என்று பேராசிரியர்கள் கேள்வி எழுப்பியுள்ளனர். அதேபோல் இன்று நடைபெற்ற கூட்டத்தில் இந்தியாவில் முதல்முறையாக மனோன்மணியம் பல்கலைக்கழகத்தில் அறிவியல் தொழில்நுட்பத்துடன் கூடிய தொல்லியல் துறை தொடங்கப்பட்டுள்ளது.
இந்த துறைக்கான ஒப்புதலும் இன்றைய கூட்டத்தில் பெறப்பட்டது. இது குறித்து பல்கலைக்கழக துணைவேந்தர் சந்திரசேகர் செய்தியாளர்களுக்கு அளித்த பேட்டியில், ''இந்த கல்வி ஆண்டில் இளங்கலை பாடப்பிரிவில் மூன்று புதிய பாடப்பிரிவுகளும் முதுகலைப் பாடப்பிரிவில் இந்தியாவில் முதல்முறையாக அறிவியல் தொழில்நுட்ப ஆய்வுடன் கூடிய தொல்லியல் துறை படிப்பும் அப்ளைடு பிசிக்ஸ் பாடப்பிரிவும்; இந்த கல்வி ஆண்டில் புதிதாக தொடங்கப்பட்டுள்ளது.
குறிப்பாக முதுகலை தொல்லியல் துறையைப் பொறுத்தவரை இந்தியாவில் முதல்முறையாக மனோன்மணியம் சுந்தரனார் பல்கலைக்கழகத்தில் தான் அறிவியல் தொழில்நுட்ப மற்றும் ஆய்வுடன் கூடிய தொல்லியல் துறை மேற்படிப்பு அறிமுகப்படுத்தப்பட்டுள்ளது.
இந்த பாடத்திட்டத்தைப் பொறுத்தவரை, தென் மாவட்டங்களில் குவிந்து கிடக்கும் அகழ்வாராய்ச்சி தொல்லியல் களங்கள் மிகப்பெரிய துணையாக இருக்கும். வெறும் அகழ்வாராய்ச்சி மட்டுமில்லாமல் புவியியல் அறிவியல் தொழில் நுட்பத்துடன் இணைந்து தொல்லியல் படிப்புகளை மேற்கொள்ள ஏதுவாக பாடத்திட்டம் வழிவகை செய்யப்பட்டுள்ளது.
இந்த பாடத்திட்டம் மூலமாக மாணவர்கள் நல்ல வேலை வாய்ப்பைப் பெற முடியும். தொல்லியல்துறை படிப்பிற்காக இத்தாலி நாட்டின் பாரி பல்கலைக்கழகத்துடன் விரைவில் புரிந்துணர்வு ஒப்பந்தம் போட நடவடிக்கைகள் எடுக்கப்பட்டு வருகிறது.
2021 - 22ஆம் ஆண்டு கல்வி ஆண்டிற்கான பட்டமளிப்பு விழா கூடிய விரைவில் நடைபெறும். இதேபோல் பல்கலைக்கழகத்தில் காலியாக உள்ள பேராசிரியர் பணியிடங்கள் விரைவில் நிரப்பப்படும்'' என்றும் துணைவேந்தர் சந்திரசேகர் தெரிவித்தார்.
அதேபோல் இன்று நடைபெற்ற நிலைக்குழு கூட்டத்தில் பேராசிரியர்களுக்கு பேச அனுமதி வழங்கவில்லை என்ற குற்றச்சாட்டு குறித்து துணைவேந்தர் சந்திரசேகரை ஈடிவி பாரத் சார்பில் பிரத்யேமாக சந்தித்து விளக்கம் கேட்கப்பட்டது. அதற்குப் பதில் கூறிய துணைவேந்தர் சந்திரசேகர், ”எப்போதும் போல கூட்டத்தை நடத்தினோம். நாங்கள் பேசுவதற்கு அவகாசம் கொடுத்தோம். ஆனால் யாரும் பேசவில்லை. யாரும் பேசாத காரணத்தால் கூட்டம் விரைவில் முடிக்கப்பட்டது'' என்று தெரிவித்தார்.
இதையும் படிங்க: நெல்லையப்பர் கோயிலில் 200 ஆண்டுகள் பழமையான அரிய ஓலைச்சுவடிகள் கண்டுபிடிப்பு! சுவடிகளை புத்தகமாக்குவதற்கான பணிகள் துவக்கம்
