திருநெல்வேலியில் செய்தியாளர்களை சந்தித்த நாம் தமிழர் கட்சியின் தலைமை ஒருங்கிணைப்பாளர் சீமான் பேசுகையில், "நாட்டின் இறையாண்மை குறித்து பேசிவிட்டு நாட்டை துண்டாக்கும் செயலை ஆர்எஸ்எஸ், பாஜக செய்கிறது. மத மோதல்களை தூண்டி தூண்டி நாட்டில் பிரிவனை ஏற்படுத்த பாஜக முயல்கிறது.
இந்தியாவின் கடன் ரூ.90 லட்சம் கோடியாக அதிகரித்துள்ளது. ரூ.7,000 கோடியை இந்தியா இலங்கைக்கு கொடுப்பதால் என்ன பயன் இருக்கிறது. இலங்கையின் சிங்களர்கள் இந்தியாவிற்கு விசுவாசமாக இருப்பார்களா?. சீனாவின் ஒரு மாகாணமாக இலங்கையை மாற்றிவிட்டது. 18 ஆண்டுகள் தொடர்ச்சியாக மத்திய அமைச்சரவையிலிருந்த திமுகவிற்கு கட்சத் தீவை மீட்க நேரம் கிடைக்கவில்லை.
இலங்கையை விட மோசமான நிலைக்கு இந்தியா தள்ளபட்டுக்கொண்டிருக்கிறது. அதிகாரத்தில் இருப்பவர்கள் மறைக்க நினைக்கிறார்கள். சாதனை விளக்க பொதுக்கூட்டம் எதற்கு..? அரசின் செயல் மக்களை சென்றடையும் போது சாதனை விளக்க பொதுக்கூட்டம் தேவையற்றது.
மத்திய அரசின் 8 ஆண்டுகால ஆட்சியும் தமிழ்நாடு அரசின் ஓராண்டு கால ஆட்சியும் சாதனையல்ல வேதனை, சோதனை. ஓராண்டு திமுக ஆட்சியின் ஊழலை கேட்கும் அண்ணாமலை, அதிமுகவின் 10 ஆண்டு கால ஆட்சியின் ஊழல் குறித்து ஏன் கேட்கவில்லை. 2024 தேர்தலில் நடக்கும் நாடாளுமன்ற தேர்தலில் கூட்டணி அமைக்காமல் பாஜக இருப்பார்களா?.
மதுரையில் எய்ம்ஸ் மருத்துவமனைக்கு ஒரு செங்கல்லே வைக்கப்பட்டது. அதையும் உதயநிதி எடுத்து சென்றுவிட்டார். திமுக பாஜகவின் பி டீம் அல்ல, அவர்களே மெயின் டீம். 8 ஆண்டு மத்திய அரசு ஆட்சியில் ஊழலே செய்யவில்லை என்று சொல்பவர்கள் ரஃபேல் போர் விமான விவகாரத்தில் 400 கோடி ஊழல் குறித்து வாய்திறக்கவில்லை. நீதிமன்றம் ரஃபேல் குறித்து கேள்வி கேட்டதற்கு பதிலும் அளிக்கவில்லை.
தமிழ்நாட்டின் ஒரே எதிர்கட்சியாக நாம் தமிழர் கட்சியே செயல்படுகிறது. 2024ஆம் ஆண்டு நாம் தமிழர் கட்சி தனித்து போட்டியிடும். இஸ்லாமியர், கிறிஸ்தவர்கள் வாக்குகள் நாம் தமிழர் கட்சிக்கு கிடைத்தால் 7 லிருந்து 10 % ஆக வாக்குவங்கி உயரும்.
நாம் தமிழர் கட்சியின் கொள்கைகள் பொது மக்களிடம் கொண்டு செல்லும் பணி தொடர்ந்து நடைபெறும். எனக்கு யாரும் போட்டியில்லை. அண்ணாமலை தமிழ் தேசியம் பற்றி பேசுவாரா? தனித்து போட்டியிடும்படி அவர் கட்சி தலைமைக்கு கூறுவாரா? அவர் முதலாளி அல்ல. பாஜகவின் முதலாளிகள் அமித்ஷாவும், மோடியுமே. ஆகவே எனக்கு யாரும் போட்டியாக வர முடியாது" என்று தெரிவித்தார்.
இதையும் படிங்க: ஆற்காடு வீராசாமி குறித்து சர்ச்சை பேச்சு - வருத்தம் தெரிவித்த அண்ணாமலை
