தேனி மாவட்டம், மேகமலை வன உயிரின சரணாலயப் பகுதியில் அண்மையில் வனத்துறை பணியாளர்கள் ரோந்துப் பணியில் ஈடுபட்டனர். அப்போது, அழுகிய நிலையில் புலி ஒன்று இறந்து கிடப்பதை கண்டறிந்தனர். இதனையடுத்து, வனத்துறை அலுவலர்களுக்கு தகவல் அளிக்கப்பட்டது. அதன்பேரில், சம்பவ இடத்துக்கு வந்த வனத்துறையினர் தேசிய புலிகள் காப்பக விதிகளின் நெறிமுறைப்படி, பிரேத பிரிசோதனை மேற்கொண்டனர்.
மதுரை கூடுதல் முதன்மை வனப்பாதுகாவலர் சுப்ரத் மொஹ்பத்ரா, மேகமலை வன உயிரின காப்பாளர் சச்சின் போஸ்லே, உள்ளிட்ட வனத்துறை அலுவலர்கள் முன்னிலையில், சத்தியமங்கலம் புலிகள் காப்பக கால்நடை மருத்துவ அலுவலர் அசோகன், கால்நடை அறுவைச் சிகிச்சை உதவியாளர்கள் வைலன், கலைவாணன், பிரபாகரன் ஆகியோர் கொண்ட மருத்துவக்குழுவினர் இறந்த புலியின் உடலை பிரேத பரிசோதனை செய்தனர்.
புலியின் கம்பீர நடை... பார்த்து ரசித்த சுற்றுலாப் பயணிகள்!
இதுகுறித்து வனத்துறை தரப்பில் கூறுகையில், ' உயிரிழந்தது 1.5 வயது ஆண் குட்டிப்புலியாகும். மூத்த வயதுடைய புலியின் தாக்குதலால் உயிரிழந்திருக்கக் கூடும். மேலும், இறந்த புலியின் உடலில் வேட்டையாடப்பட்டதற்கான அடையாளங்கள் ஏதும் இல்லை. பிரேத பரிசோதனைக்குப் பின்னர் புலியின் உடல் அங்கேயே எரிக்கப்பட்டது.
மேகமலை வனப்பகுதியில் இந்த ஆண்டு ஏப்ரல் மாதம் 10 வயது ஆண் புலி இறந்ததையடுத்து, தற்போது இரண்டாவது முறையாக குட்டிப்புலி இறந்திருப்பது குறிப்பிடத்தக்கது.
