தேனி மக்களவைத் தொகுதியில் அதிமுக சார்பில் துணை முதலமைச்சர் ஓ.பன்னீர்செல்வத்தின் மகன் ரவீந்திரநாத் களமிறங்கியுள்ளார். இதற்கிடையே தனது அரசியல் எதிரியான ஓ.பன்னீர்செல்வத்தின் மகனை தோற்கடிக்க டிடிவி தினகரன் கடுமையான வியூகங்களை வகுத்துவருவதாக தகவல்கள் வெளியாகின. அதனையடுத்து, ”தேனியில் தானே களமிறங்கினாலும் களமிறங்குவேன்” என டிடிவி கூறியிருந்தார்.
இதனையடுத்து அமமுகவின் இரண்டாம் கட்ட வேட்பாளர் பட்டியல் இன்று வெளியிடப்பட்டது. அதில் தேனி மக்களவைத் தொகுதியில் தங்க தமிழ்ச்செல்வன் களமிறங்குவார் என தெரிவிக்கப்பட்டுள்ளது. ஓபிஎஸ்ஸின் சொந்த தொகுதியான தேனியில் அவரது செல்வாக்கை உடைக்க தங்க தமிழ்ச்செல்வன்தான் சரியான நபர் என தினகரன் கருதுவதால் அவரை களமிறக்கி ஓபிஎஸ்ஸுக்கும் அவரது மகனுக்கும் செக் வைத்துள்ளார் என அரசியல் நோக்கர்கள் கூறுகின்றனர்.
இந்நிலையில், ஓபிஎஸ் மகன் ரவீந்திரநாத் இன்று வேட்புமனு தாக்கல் செய்யவிருக்கிறார். அதனையொட்டி ஸ்ரீவில்லிபுத்தூரில் இருக்கும் அவரது குலதெய்வமான பேச்சியம்மன் கோயிலில் சிறப்பு பூஜை செய்தார். அதன்பிறகு செய்தியாளர்களிடம் பேசிய அவர், “எங்களின் பரப்புரை யுக்திகளும், மக்களும் தங்க தமிழ்ச்செல்வனுக்கு பதில் சொல்வார்கள்” என்றார்.
ஆனால் நீண்டகாலமாக தேனியிலும் அதன் சுற்றுவட்டாரத்திலும் செல்வாக்கோடு இருக்கும் தங்க தமிழ்ச்செல்வன் கொடுக்கப் போகும் நெருக்கடியை ஓபிஆரால் தாங்க முடியுமா? என மிரட்டல் கேள்வி விடுத்துள்ளனர்.
