தேனி மாவட்ட அனைத்திந்திய ஜனநாயக மாதர் சங்கத்தினர், மாவட்ட காவல் கண்காணிப்பாளரிடம் இன்று புகார் மனு அளித்தனர். அதில் “தேனி மாவட்டம் பெரியகுளம் அருகே உள்ள கீழகாமக்காபட்டியைச் சேர்ந்த பெருமாள் குமரன் என்பவர், அதே பகுதியில் உள்ள 56 வயது மூதாட்டியை கடந்த 20ஆம் தேதி அங்குள்ள தோட்டத்தில் மாடு மேய்த்துக் கொண்டிருந்த போது பாலியல் ரீதியாகத் தொந்தரவு செய்துள்ளார். மேலும், இந்த விவகாரத்தை யாரிடமும் சொல்லக்கூடாது என்று கூறி அருகிலிருந்த கட்டையால் மூதாட்டியைப் பலமாகத் தாக்கியுள்ளார். இதனைக் கண்ட பக்கத்து தோட்டத்தினர், குமரனை விரட்ட அங்கிருந்து அவர் தப்பி ஓடியுள்ளார்.
இதில் பலத்த காயமடைந்த மூதாட்டிக்குப் பெரியகுளம் மாவட்ட அரசு மருத்துவமனையில் முதலுதவி சிகிச்சை அளிக்கப்பட்டது. பின்னர் தேனி அரசு மருத்துவக் கல்லூரிக்கு மேல் சிகிச்சைக்காக அனுப்பி வைக்கப்பட்டு தற்போது அங்கு அவருக்குத் தீவிர சிகிச்சை அளிக்கப்பட்டு வருகின்றது. எனவே மூதாட்டிக்கு பாலியல் ரீதியாகத் தொந்தரவு செய்த பெருமாள் குமரன் மீது உடனடியாக உரிய நடவடிக்கை எடுக்க வேண்டும்” என, பாதிக்கப்பட்ட மூதாட்டியின் மகள் மற்றும் அனைத்திந்திய ஜனநாயக மாதர் சங்கத்தினர் மாவட்ட காவல் கண்காணிப்பாளரிடம் புகார் அளித்தார்.
