தேனி மாவட்டம் கம்பம் அருகே உள்ள சுருளி அருவியில் இன்று சாரல் விழா நடைபெற்றது. சுற்றுலாத் துறை சார்பில் நடைபெற்ற இவ்விழாவில் துணை முதலமைச்சர் ஓ. பன்னீர்செல்வம், வனத்துறை அமைச்சர் திண்டுக்கல் சீனிவாசன், சுற்றுலாத் துறை அமைச்சர் வெல்லமண்டி நடராஜன், தேனி மக்களவை உறுப்பினர் ரவீந்திரநாத் குமார் உள்ளிட்டோர் கலந்து கொண்டனர்.
விழாவில் பேசிய அமைச்சர் திண்டுக்கல் சீனிவாசன், இறைவனின் அருளாசி ஒரு சிலருக்கு மட்டும்தான் கிடைக்கும். அந்த அருளாசி கிடைக்கப் பெற்றவர் நமது ஓபிஎஸ் என்றார். மேலும், முதலமைச்சருக்கும், துணை முதலமைச்சருக்கும் நான்கு கண்கள், ஆனால் பார்வை ஒன்று தான் என்று கூறிய அவர், இருவரும் ஒற்றுமையாக இருந்து கட்சி, ஆட்சியை சிறப்பாக வழிநடத்துகிறார்கள் என்றார்.
தொடர்ந்து பேசிய அவர், முதலமைச்சர் எப்படி உலக நாடுகளுக்கு எல்லாம் சென்று தமிழ்நாட்டிற்கு தொழில் முதலீடுகளை பெற்று வந்தார். நமது துணை முதலமைச்சரோ அமெரிக்காவில் தங்கதமிழ்ச்செல்வன் பட்டம் பெற்றதாகப் பேசினார். அமைச்சரின் இந்த பேச்சால், துணை முதலமைச்சர் உள்பட மேடையில் இருந்தவர்கள், பார்வையாளர்கள் பொதுமக்கள் என அனைவரும் சிரித்தனர்.
பின்னர் சுதாரித்துக் கொண்ட அமைச்சர், இதில் என்ன இருக்கிறது, ‘தங்க தமிழ் மகன்’ விருது பெற்றவர் ஓபிஎஸ் என்றார்.
