போடி குப்பிநாயக்கன்பட்டியைச் சேர்ந்தவர் வழக்கறிஞர் கனி (38). தேவாரம் சாலையில் சட்ட ஆலோசனை மையம் நடத்திவரும் இவரிடம், ரமாதேவி (23) என்ற பெண் வழக்கறிஞர் உதவியாளராக பணிபுரிந்து வருகிறார். இந்நிலையில், வழக்கறிஞர் கனி, போடி நீதித்துறை நடுவர் நீதிமன்றத்தில் போலியான ஆவணங்கள் தயார் செய்து, குற்றவாளிகளை பிணையில் எடுத்ததாக, வழக்கறிஞர் சந்திரசேகர் என்பவர், தேனி மாவட்ட தலைமை நீதித்துறை நடுவர் நீதிமன்றத்தில் புகாரளித்தார்.
அதனடிப்படையில், போடி நீதித்துறை நடுவர் நீதிமன்ற தலைமை எழுத்தர் ஜமீன்தார் மேற்கொண்ட ஆய்வில், கிராம நிர்வாக அலுவலர்களால் அளிக்கப்படும் சான்றிதழ்களை, வழக்கறிஞர் கனி போலியாக தயாரித்து, அதனை நீதிமன்றத்தில் தாக்கல் செய்து குற்றவாளிகளுக்கு பிணை வாங்கித் தந்தது கண்டறியப்பட்டது. இதற்கு உடந்தையாக அவரது உதவியாளர் ரமாதேவி செயல்பட்டதும் தெரிய வந்தது.
இவ்வாறு சுமார் 30க்கும் மேற்பட்டோருக்கு வழக்குகளில் இவர்கள் இருவரும் பிணை பெற்றுத்தந்தது முதல்கட்ட ஆய்வில் தெரிந்ததைடுத்து, போடி காவல் துறையினர் வழக்கறிஞர்கள் கனி, ரமாதேவி மற்றும் மனுதாரர்கள் 30க்கும் மேற்பட்டோர் மீது 5 பிரிவுகளின் கீழ் வழக்குப்பதிவு செய்தனர். பின்னர், வழக்கறிஞர்கள் கனி மற்றும் ரமாதேவி ஆகியோர் கைது செய்யப்பட்டு நீதிமன்றத்தில் ஆஜர்படுத்தப்பட்டு, சிறையில் அடைக்கப்பட்டனர்.
போலி ஆவணங்கள் தயார் செய்து குற்றவாளிகளை பிணையில் எடுத்து வழக்கறிஞர்கள் கைதாகியுள்ள நிகழ்வு, நீதித்துறைக்கே கலங்கமாகியுள்ளதாக சட்டத்தின் மீது நம்பிக்கையுள்ளவர்கள் கருத்து தெரிவித்துள்ளனர்.
இதையும் படிங்க: சாதியை காரணம் காட்டி பதவி மறுப்பு; தொடரும் சாதிய ஒடுக்குமுறை!
