தேனி மாவட்டத்தின் சண்முகாநதி நீர்த்தேக்கத்திலிருந்து வினாடிக்கு 14.47 கனஅடி வீதம், டிசம்பர் 15ஆம் தேதி முதல் 50 நாள்களுக்குத் தண்ணீர் திறந்துவிட தமிழ்நாடு முதலமைச்சர் எடப்பாடி பழனிசாமி உத்தரவிட்டுள்ளார்.
இதுகுறித்து வெளியிட்டுள்ள செய்திக்குறிப்பில், “தேனி மாவட்டம் சண்முகாநதி நீர்த்தேக்கத்தின் கீழுள்ள உத்தமபாளையம் வட்டத்தைச் சார்ந்த புன்செய் நிலங்கள் பயன்பெறும் வகையில், சண்முகாநதி நீர்த்தேக்கத்திலிருந்து தண்ணீர் திறந்துவிடுமாறு வேளாண் பெருங்குடி மக்களிடமிருந்து கோரிக்கைகள் வந்துள்ளன.
வேளாண் பெருமக்களின் வேண்டுகோளினை ஏற்று, தேனி மாவட்டம் சண்முகாநதி நீர்த்தேக்கத்திலிருந்து வினாடிக்கு 14.47 கனஅடி வீதம், டிசம்பர் 15ஆம் தேதி முதல் 50 நாள்களுக்குத் தண்ணீர் திறந்துவிட ஆணையிட்டுள்ளேன்.
இதனால், தேனி மாவட்டம் உத்தமபாளையம் வட்டத்தைச் சார்ந்த ராயப்பன்பட்டி, மல்லிங்காபுரம், சின்ன ஓவுலாவுரம், எரசக்கநாயக்கனூர், கன்னிசேர்வைபட்டி, அழகாபுரி, ஓடைப்பட்டி, சீப்பாலக்கோட்டை ஆகிய எட்டு வருவாய் கிராமங்களிலுள்ள ஆயிரத்து 640 ஏக்கர் புன்செய் நிலங்கள் பாசன வசதி பெறும் என்பதை தெரிவித்துக் கொள்கிறேன்.
மேலும், விவசாயப் பெருமக்கள் நீரை சிக்கனமாக பயன்படுத்தி, நீர் மேலாண்மை மேற்கொண்டு, உயர் மகசூல் பெற வேண்டுமாய் அன்புடன் கேட்டுக்கொள்கிறேன்” எனத் தெரிவிக்கப்பட்டுள்ளது.
இதையும் படிங்க: 2ஆம் போக பாசனத்திற்குத் தண்ணீர் திறப்பு - முதலமைச்சர் உத்தரவு
