தேனி மாவட்டம் ஆண்டிபட்டி அருகே கண்டமனூர் வனச்சரகத்திற்குள்பட்ட மேற்குத்தொடர்ச்சி மலையில் யானை, புலி, சிறுத்தை, கரடி, கருமந்தி, சிங்கவால்குரங்கு, காட்டுமாடு, மான், செந்நாய், வரையாடு உள்ளிட்ட பலவகை வனவிலங்குகள் உள்ளன.
இந்த வனப்பகுதி கேரள மாநில எல்லைப்பகுதியில் உள்ளதால் அடையாளம் தெரியாத நபர்கள் வேட்டையாடிவிட்டு தப்பிச்செல்வது வழக்கமாக இருந்துவருகிறது. இதனைத் தடுக்க கண்டமனூர் வனத் துறையினர் துப்பாக்கிகளுடன் ரோந்துப் பணியில் ஈடுபட்டுவருகின்றனர்.
இந்நிலையில், கண்டமனூர் வனச்சரக அலுவலர் செல்வராஜ் தலைமையில் வனத் துறையினர் பீட் சன்னாசியப்பன் கோயில் அருகே ரோந்து செல்லும்போது துப்பாக்கியால் சுடும் சத்தம் கேட்டுள்ளது.
உடனடியாக வனத் துறையினர் வனப்பகுதியிலிருந்த ஐந்து பேர் கொண்ட கும்பலைப் பிடிக்க முயற்சித்தனர். வனத் துறையினர் சுற்றிவளைத்ததை அறிந்த வேட்டைக்கும்பல் சரணடைவதைப்போல் போக்குக்காட்டிவிட்டு தப்பியோடிவிட்டனர்.
பின்னர் வனத் துறையினர் வேட்டைக்கும்பல் விட்டுச்சென்ற நாட்டுத்துப்பாக்கி, கருமந்தி ஆகியவற்றை கைப்பற்றி ஆண்டிபட்டி நீதிமன்றத்தில் ஒப்படைத்தனர். மேலும் வேட்டைக்கும்பல் குறித்து வழக்குப்பதிவு செய்து விசாரணை மேற்கொண்டுவருகின்றனர்.
இதையும் படிங்க: கொடைக்கானலில் காட்டுப்பன்றியை வேட்டையாடிய 4 பேர் கைது!
