உலகத்தை அச்சுறுத்தி வரும் கரோனா தொற்றிலிருந்து தற்காத்துக் கொள்வதற்கு நாளொன்றுக்கு 20 முறை கைகளை சுத்தம் செய்ய வேண்டும், முகக் கவசம் அணிய வேண்டும் என அரசு அறிவுறுத்தியுள்ளது. இதனால் தமிழ்நாட்டில் முகக் கவசம், கிருமிநாசினி மருந்து ஆகியவற்றிற்கு தட்டுப்பாடு ஏற்பட்டுள்ளது. இதைப் போக்க தமிழ்நாடு அரசு, மகளிர் சுய உதவிக் குழுக்களின் உதவியை நாடியுள்ளது.
தேனி மாவட்டம் கொடுவிலார்பட்டியில் இயங்கும் புதுமை மகளிர் சுய உதவிக்குழுவினர், இந்த பணிகளில் மும்முரமாக இயங்கி வருகின்றனர். சமீப காலமாக சானிட்டரி நாப்கின் தயாரிப்பில் பல சாதனைகளை புரிந்த இவர்கள், தற்போது கிருமி நாசினி தயாரிப்பில் ஈடுபட்டு வருகின்றனர். தேனி மாவட் மகளிர் திட்ட இயக்குனர் அறிவுறுத்தலின்படி கிருமிநாசினி தயாரிக்கும் ஒரே மகளிர் குழுவும் இவர்கள்தான்.
இது குறித்து இவர்கள் கூறுகையில், "இந்த மருந்து தயாரிப்பதற்காக பயன்படுத்தும் மூலப்பொருட்களை கலந்து பெரிய கேனில் சுமார் 30 மணி நேரம் ஊற வைப்போம். பின்னர் இதில் தண்ணீரையும் வைட்டமின் - ஈ நிறைந்த கற்றாழைச் சாறையும் கலந்து தனி தனி பாட்டீல்களில் ஊற்றி விற்பனை செய்கிறோம்." என்றனர். இப்படி தயாரிக்கப்படும் இந்த கிருமி நாசினி மருந்து அரை லிட்டர் பாட்டீல் 45 ரூபாய்க்கு விற்பனை செய்யப்படுகிறது. இதற்கான மூலப் பொருட்களை வாங்குவதற்காக மகளிர் திட்டம் சார்பில் முன்பணமாக ரூ 50,000 இவர்களுக்கு கொடுக்கப்பட்டுள்ளது.
தேனி அரசு மருத்துவக்கல்லூரி மருத்துவமனைக்கு வரும் நோயாளிகள், அவர்களது உறவினர்கள் என அனைவருக்கும் இவர்களால் தயாரிக்கப்பட்ட கிருமிநாசினி வழங்கி கைகளை சுத்தம் செய்த பின்னரே மருத்துவமனைக்குள் அனுமதிக்கின்றனர். ஊரடங்கு உத்தரவு காரணமாக கடைகள் அனைத்தும் அடைக்கப்பட்டு இருப்பதால் மூலப்பொருள் கிடைப்பதில் கொஞ்சம் சிக்கல் ஏற்பட்டுள்ளது. இருப்பினும் மாவட்ட நிர்வாகத்தின் ஒத்துழைப்போடு கிருமிநாசினி தயாரிக்கும் பணி தொடர்ந்து நடைபெற்று வருகிறது.
சாதாரண சானிடைசருக்கும் இந்த கற்றாழை சானிடைருக்கும் வித்தியாசம் உண்டு. இந்த கற்றாழை சானிடைசரை பயன்படுத்துவதால் நமது தோலுக்கு எந்தவித எரிச்சலும், பக்க விளைவுகளும் ஏற்படுவதில்லை. கைகளை சுத்தம் செய்ய இதை பயன்படுத்தினால் போதும். கரோனாவைக் கண்டு அச்சப்பட தேவையில்லை.
இதையும் படிங்க: இவர்கள் சிங்கப் பெண்களல்ல... பருத்திப் பெண்கள்...!
