நீலகிரி மாவட்டம், குன்னூரில் படுகர் இன மக்களின் முக்கிய பண்டிகையான ஹெத்தையம்மன் பண்டிகை கடந்த சில நாட்களாக நடந்து வருகிறது. அதில் குன்னூர் அருகே உள்ள ஜெகதளா கிராமத்தைச் சுற்றியுள்ள காரக்கொரை, மஞ்சுதளா, மல்லிகொரை, பேரட்டி, ஓதனட்டி, பிக்கட்டி உட்பட ஆறு ஊர்களைச் சேர்ந்த மக்கள் ஒன்றிணைந்து விழாவைக் கொண்டாடுகின்றனர்.
விழாவிற்காக விரதம் இருக்கும் ஹெத்தைக்காரர்கள் கடந்த ஏழு நாட்களாக காரக்கொரை கிராமத்தில் உள்ள "மக்கமனை' என்ற கோயிலில் தங்கி, சிறப்பு பூஜை நடத்தினர். பின், ஹெத்தையம்மன் குடையை ஏந்தியவாறு, ஆறு ஊர்களில் உள்ள கோயில்களுக்கும் சென்று, சிறப்பு பூஜை செய்தனர். கடந்த இரு நாளுக்கு முன் காரக்கொரை கோயில் வளாகத்தில் நூற்றுக்கணக்கான பக்தர்கள் பூ குண்டம் இறங்கி, நேர்த்திக் கடன் செலுத்தினர்.
இந்நிலையில் இன்று காலை ஆறு ஊர் படுகர் இன மக்கள் வெள்ளை ஆடை போர்த்தி, பாரம்பரிய உடையணிந்து, மேள தாளத்துடன் ஆடிவந்தனர். இந்த விழாவில் பத்தாயிரத்திற்கும் மேற்பட்ட மக்கள் பங்கேற்றனர்.
இதையும் படிங்க..பொங்கல் பண்டிகைக்கு களைகட்டாத கோயம்பேடு!
