நீலகிரி மாவட்டத்தில் செயல்பட்டு வந்த 30 அரசு மதுபானக் கடைகள், உயர் நீதிமன்ற உத்தரவையடுத்து மூடப்பட்டுள்ளன. இந்த சூழலில் உதகை அருகே இத்தலார் கிராமத்தில் செயல்பட்டு வரும் அரசு மதுபானக் கடையை அகற்ற வலியுறுத்தி இத்தலார், பெம்பட்டி, போர்த்தி ஆடா உள்ளிட்ட 5 கிராமங்களைச் சார்ந்த 500க்கும் மேற்பட்ட படுகர் இன மக்கள், உதகையில் உள்ள நீலகிரி மாவட்ட ஆட்சியர் அலுவலகத்தை முற்றுகையிட்டனர்.
அப்போது, பாரம்பரிய வெள்ளை நிற உடைகளை அணிந்து வந்த அவர்கள், இத்தலார் கிராமத்தில் பள்ளி, கோயில், நியாவிலைக் கடை, பேருந்து நிலையம் ஆகியவற்றின் அருகில் அரசு மதுபானக் கடை கேளிக்கை விடுதியுடன் செயல்பட்டு வருவதாக தெரிவித்தனர்.
மேலும் அந்த கடைக்கு வரும் குடிமகன்கள் மது அருந்திவிட்டு அந்த வழியாகச் செல்லும் பெண்கள் மற்றும் பள்ளி மாணவர்களை தகாத வார்த்தைகளால் திட்டுவதாகவும், இதனால் பெண்களும், மாணவர்களும் அந்த வழியாகச் சென்று வர முடியாத நிலை ஏற்பட்டுள்ளதாக வேதனை தெரிவித்தனர்.
அதன்பின், சம்பந்தப்பட்ட கடையை அங்கிருந்து வேறு இடத்திற்கு மாற்ற நடவடிக்கை எடுக்கப்படும் என மாவட்ட வருவாய் அலுவலர் உறுதி அளித்ததையடுத்து, படுகர் இன மக்கள் போராட்டத்தை கைவிட்டு அங்கிருந்து கலைந்து சென்றனர்.
