தமிழ்நாட்டில் பிளாஸ்டிக் விற்பனைக்கு தடை விதிக்கப்பட்டுள்ள நிலையில், தஞ்சை மாவட்ட ஆட்சியர் அண்ணாதுரை உத்தரவின்பேரில் மாநகராட்சி, நகராட்சி அலுவலர்கள் டவுன்பகுதியில் தொடர் சோதனையில் ஈடுபட்டு வருகிறார்கள். இந்நிலையில், தஞ்சை நகர் நல அலுவலர் நமச்சிவாயம், தலைமையில் 10 பேர் கொண்ட குழு தஞ்சை கீழவாசல் பகுதியில் சோதனையில் ஈடுபட்டனர்.
அப்போது மார்க்கெட் பகுதியில் அமைந்துள்ள சங்கர் என்பவருக்கு சொந்தமான கடையில் நான்கு துப்புரவு ஆய்வாளர்கள், பெண் மேற்பார்வையாளர்கள் உட்பட 6 பேர் கடைக்குள் சென்று பிளாஸ்டிக் பொருள் உள்ளதா என சோதனை மேற்கொண்டனர். அப்போது கடையிலிருந்த இரண்டு ஊழியர்கள், திடீரென வெளியே வந்து அலுவலர்களை உள்ளே வைத்து கடையின் ஷட்டரை இழுத்து மூடினர். அதேபோல் கடைக்கு செல்லும் மின் இணைப்பையும் துண்டித்துவிட்டு ஓடினர். இதனால் அங்கே சிறிது நேரம் பரபரப்பு ஏற்பட்டது.
பின்னர் கடைக்குள் சிக்கிக்கொண்ட அலுவலர்களை, வெளியிலிருந்தவர்கள் காப்பாற்றினர். இதனையடுத்து கடையில் வைத்திருந்த பிளாஸ்டிக் பொருட்கள் பறிமுதல் செய்தனர். இது தொடர்பாக காவல்துறையினரிடம் புகார் செய்யப்பட்டது.
இதுகுறித்து அலுவலர்கள் பேசுகையில், தஞ்சை நகர் முழுவதும் பிளாஸ்டிக் பொருட்கள் விற்பனை செய்தாலோ, பதுக்கி வைத்தாலோ உடனடியாக அபராதம் விதிக்கப்படும். தற்போது கடைக்குள் அலுவலர்களை வைத்து பூட்டிய சம்பவத்தில் கடையின் உரிமையாளர், ஊழியர்களிடம் காவல்துறையினர் விசாரித்து வருகிறார்கள். மேலும் கடையில் இருந்த பிளாஸ்டிக் பொருட்களும் பறிமுதல் செய்யப்பட்டு, சீல் வைக்க நடவடிக்கை மேற்கொண்டு வருகிறோம் எனத் தெரிவிதனர்.
