தஞ்சாவூர் மாவட்டம் பட்டுக்கோட்டை அருகிலுள்ள சேண்டாகோட்டை கிராமத்தைச் சேர்ந்தவர் சித்திரவேல். 72 வயதாகும் இவர், குடும்ப வறுமையின் காரணமாக கடந்த நான்கு வருடங்களுக்கு முன்னர் மலேசியாவுக்குச் சென்று வேலை பார்த்து வரலாம் என்று நினைத்து, வட்டிக்கு கடன் வாங்கி அந்நாட்டிற்குச் சென்றுள்ளார்.
அங்கு இவரை அழைத்துச் சென்ற ஏஜெண்ட், இவருக்கு முறையான வேலையைப் பெற்றுத் தராமல் ஏமாற்றியுள்ளார். இதனால், வேலையின்றி கஷ்டப்படுவதாகவும், கோயில்கள் உள்ளிட்ட பொது இடங்களில் கிடைக்கும் உணவுகளை உண்டு நாட்களைக் கழித்துவருவதாகவும் குடும்பத்தாருக்கு சித்திரவேல் தகவல் தெரிவித்துள்ளார். இதனால் அவரது உடல் நிலை கடுமையாகப் பாதிக்கப்பட்டுள்ளது.
இதையடுத்து, சித்திரவேல் தனது மகன் பாஸ்கருக்கு சில மாதங்களுக்கு முன்னர் தொலைபேசியில் தொடர்புகொண்டு, நான் பட்டினியில் அவதிப்படுகிறேன், எனக்கு உடல் நிலை சரியில்லை, மிகவும் பயமாக உள்ளது, என்னை ஊருக்கு அழைத்துச் செல்ல முயற்சி செய்யுங்கள் என்று தெரிவித்துள்ளார்.
இதையடுத்து, அவரது மகன் பாஸ்கர் மலேசியாவில் உள்ள உறவினர்களிடம் தனது தந்தையின் நிலை குறித்து தெரிவித்து, அவரை ஊருக்கு அனுப்ப உதவுமாறு வேண்டியுள்ளார். ஆனால், ஏஜெண்ட்டால் ஏமாற்றப்பட்டதால் அவரிடம் பாஸ்போர்ட் கூட இல்லை என்றும், தங்களால் எந்த உதவியும் செய்ய இயலாது எனவும் உறவினர்கள் கைவிரித்துள்ளனர். இதனால், செய்வதறியாமல் திகைத்த பாஸ்கர், அவரது தாய் மாணிக்கம் ஆகியோர் மிகவும் கவலையடைந்தனர்.
இதையும் படிங்க: 'என்னை ஏமாற்றிவிட்டார்கள், நாடு திரும்ப உதவுங்கள்'- முதியவர் உருக்கம்
இந்நிலையில், மலேசியாவில் உள்ள ‘மலேசிய உலக மனிதம்’ என்ற தொண்டு நிறுவனத்தின் நிர்வாகி கமலநாதன் என்பவர் கடந்த 15 தினங்களுக்கு முன்பு ஈடிவி பாரத் செய்திகளுக்கு தகவல் கொடுத்ததோடு, சித்திரவேல் மலேசியாவிலிருந்து பேசிய உருக்கமான பேட்டியையும் அனுப்பி வைத்தார்.
இதையடுத்து சித்திரவேல் பேட்டி, அவரது மகன் பாஸ்கர் பேட்டி ஆகியவை ஈடிவி பாரத் செய்திகளில் இரண்டு முறை வெளியானது. இதையடுத்து வருவாய்த்துறை அலுவலர்கள் சேண்டாகோட்டையிலுள்ள சித்திரவேல் வீட்டிற்கு நேரடியாகச் சென்று விசாரணை மேற்கொண்டு, மாவட்ட ஆட்சியரிடம் அறிக்கை சமர்ப்பித்தனர்.
அதன்பேரில், மாவட்ட ஆட்சியர் இந்திய தூதரகத்தைத் தொடர்புகொண்டு பேசியுள்ளார். பின்னர், மத்திய அரசின் உடனடி நடவடிக்கையால், கடுமையான உடல்நிலை பாதிப்போடு சித்திரவேல் பத்திரமாக நாடு திரும்பினார். அவருக்கு தொடர்ச்சியாக மருத்துவ சிகிச்சை அளிக்கப்பட்டு தற்போது நலமுடன் உள்ளார்.
இதையடுத்து, சித்திரவேல் குடும்பத்தாரும், உறவினர்களும் அவர் நலமுடன் நாடு திரும்ப நடவடிக்கை எடுத்த கமலநாதன், வருவாய்த் துறை அலுவலர்கள், மத்திய அரசு அலுவலர்கள் மற்றும் ஈடிவி பாரத் செய்திகளுக்கு நன்றி தெரிவித்தனர்.
இதையும் படிங்க: மலேசியாவில் உணவின்றி தவிக்கும் தஞ்சை முதியவர் - மீட்க வலியுறுத்தி குடும்பத்தினர் கோரிக்கை!
