'காணவில்லை' என்ற காவி நிற போஸ்டரால் கும்பகோணத்தில் பரபரப்பு!

கும்பகோணத்தில் 'காணவில்லை' என்ற தலைப்பில் காவி நிற பின்னணியில் ஒட்டப்பட்டுள்ள போஸ்டர் குறித்து காவல் துறையினர் விசாரணை மேற்கொண்டு வருகின்றனர்.

தஞ்சாவூர்: கும்பகோணம் மாநகரில் உள்ள லட்சுமி விலாஸ் அக்ரஹாரம், பாணாதுறை திருமஞ்சன வீதி, நால்ரோடு, பாலக்கரை, மடத்துத்தெரு, பெரிய கடைவீதி, மகாமககுளம் உள்ளிட்ட பல இடங்களில் குறிப்பிட்ட ஒரு போஸ்டர், அகில இந்திய புரபஷ்னல் காங்கிரஸ் - தமிழ்நாடு என்ற பெயரில் ஒட்டப்பட்டுள்ளது.

காணவில்லை என்ற தலைப்பில் ஒட்டப்பட்டுள்ள அந்த போஸ்டரில், காவி நிறத்தில் உள்ள ஒருவரின் நிழல் படம் உள்ளது. மேலும் அதில், "டாலரை 40 ரூபாய்க்கு கொண்டு வருவாங்க என சொன்ன நபரை தேடுகிறோம்" என எழுதப்பட்டுள்ளது. இதனையடுத்து இந்த போஸ்டர் குறித்து காவல் துறையினர் விசாரணை மேற்கொண்டு வருகின்றனர்.

காங்கிரஸ் பெயரில் போஸ்டர், டாலர் - ரூபாய் தொடர்பான வாசகம் அதோடு காவி நிறத்தில் உள்ளதால் மத்திய அரசை தான் காங்கிரஸ் கட்சியினர் மறைமுக சாடுகின்றனரோ என்று கும்பகோணம் மக்கள் பேசி புலம்பி வருகின்றனர். இந்த போஸ்டரை பலரும் பகிர்ந்து வருவதால் இணையத்தில் பேசுபொருளாகியுள்ளது.

இதையும் படிங்க: அண்ணாமலையால் பெண்களுக்கு பாதுகாப்பு இல்லை.. போலீஸில் புகார் அளிப்பேன்.. காயத்ரி ரகுராம் பகீர்..