தஞ்சாவூர்: காந்தியின் பிறந்தநாள் விழா, காந்தி ஜெயந்தியாக நாடு முழுவதும் நேற்று (அக்.2) கொண்டாடப்பட்டது. இந்திய நாட்டிற்கு சுதந்திரம் பெற்று தந்த தலைவர்களில் காந்தியின் பங்கு பெரும் அங்கம் வகித்ததாக கருதப்படுகிறது. இதனையடுத்து, காந்தியின் 155வது பிறந்தநாள் விழாவினை பல்வேறு அமைப்புகளும், அரசியல் கட்சிகளும் கொண்டாடினர்.
மேலும், அவரது உருவச் சிலை மற்றும் உருவப்படத்திற்கு மாலை அணிவித்து மரியாதை செலுத்தினர். அந்த வகையில், தஞ்சாவூர் மாவட்டத்தில், மாவட்ட ஆட்சியர் தீபக் ஜேக்கப் ராணுவத்தினர் மாளிகை வளாகத்தில் உள்ள காதி கிராப்ட் கதர் விற்பனை நிலையத்தில், அலங்கரித்து வைக்கப்பட்டிருந்த காந்தியின் உருவப்படத்திற்கு மலர் தூவி மரியாதை செலுத்தினார்.
பின்னர், தீபாவளி பண்டிகையை முன்னிட்டு கதர் சிறப்பு விற்பனையை தொடங்கி வைத்தனர். இந்நிலையில், காந்தியின் சில சுவாரஷ்ய நிகழ்ச்சிகளும் தஞ்சையில் நடைபெற்றுள்ளன. காந்தி குறித்து மாநகராட்சியில் அரசுப் பணியில் கண்காணிப்பாளராக இருந்து ஓய்வு பெற்ற கிளமெண்ட் என்பவர் சில தகவலைத் தெரிவித்தார்.
அதாவது, "தஞ்சை மாநகராட்சியில் காந்தியின் மார்பளவு சிலை உள்ளது. கடந்த 1948ஆம் ஆண்டு ஜனவரி 30ஆம் தேதி காந்தி உயிரிழந்தபோது, அவரது அஸ்தி தஞ்சை மாவட்டம் திருவையாறு காவிரி ஆற்றில் கரைக்க வந்தனர். அப்போது, தஞ்சாவூரில் நகராட்சி அலுவலகத்தில் அவரது அஸ்தி பொதுமக்களின் அஞ்சலிக்காக வைக்கப்பட்டது.
அதன் நினைவாகத்தான் காந்தி சிலை திறக்கப்பட்டுள்ளது. மேலும், கூடுதல் சிறப்பு செய்தியாக காந்தி சிலை அமைந்துள்ள குறைந்த சதுர அடி நிலம், அப்போதைய மாவட்ட காங்கிரஸ் கட்சிக்கு பட்டா போட்டு கொடுத்துள்ளதாக தகவல் வழி செய்தி ஆகும். அதேபோல், தஞ்சாவூரின் மையப்பகுதியில் பெசண்ட் அரங்கம் உள்ளது. அது இப்போது பெசண்ட் லாட்ஜ் என்று கூறப்படுகிறது.
இந்த அரங்கத்திற்கு 1919 மார்ச் மாதம் காந்தி வந்து, அங்குள்ள மஹாகனி மரத்தடியில் நீண்ட உரை ஆற்றியுள்ளார். அந்த உரையை கேட்க மட்டும் சுமார் 10 ஆயிரத்திற்கும் மேற்பட்டோர் கலந்து கொண்டுள்ளனர். இது தஞ்சைக்கு கிடைத்த பெருமை ஆகும். இதேபோல் தஞ்சை பெரிய கோயில் அருகே பழமையான சிவகங்கை பூங்கா இன்றும் உள்ளது.
அந்த பூங்காவில் காந்தியின் 78வது பிறந்தநாள் நினைவாக 1947ஆம் ஆண்டு அக்டோபர் 2 அன்று சிலை திறக்கப்பட்டுள்ளது. அந்த சிலை, காந்தி உயிருடன் இருக்கும்போதே, தஞ்சாவூரில் திறக்கப்பட்ட சிலை ஆகும். இதேபோல் வடக்கு வீதி செயிண்ட் பீட்டர்ஸ் பள்ளி மைதானத்திற்கும் காந்தி உரையாற்ற வந்துள்ளார்.
காந்தியின் நினைவாக காந்திஜி ரோடும் தஞ்சையில் உள்ளது. தஞ்சாவூரில் வடக்குவீதி, சிவகங்கை பூங்கா, மாநகராட்சி வளாகம் ஆகிய 3 இடங்களில் காந்தியின்உருவ சிலை உள்ளது" என தெரிவித்தார். இவர் தஞ்சாவூர் மாநகரைப் பற்றி மூன்று நூல்களையும் வெளியிட்டுள்ளார்.
இதனிடையே தஞ்சாவூர் ஜோதி அறக்கட்டளை, மாவட்ட போக்குவரத்து போலீசாருடன் இணைந்து காந்தி ஜெயந்தியை முன்னிட்டு காந்தி வேடமணிந்த சிறுவர் உடன் இருசக்கர வாகன ஓட்டிகளிடம் போக்குவரத்து உறுதிமொழி ஏற்று, அவர்களுக்கு காந்தியின் புத்தகம் மற்றும் காந்திக்கு பிடித்தமான நிலக்கடலையை வழங்கினர். மேலும், இந்நிகழ்ச்சியில் டிஎஸ்பி ராஜா, போக்குவரத்து காவல் ஆய்வாளர் ரவிச்சந்திரன், அறக்கட்டளை செயலாளர் பிரபுராஜ்குமார் உள்ளிட்டோர் கலந்து கொண்டனர்.
இதையும் படிங்க: நாட்டின் முதல் சாதிவாரி கணக்கெடுப்பு: விவரங்களை வெளியிட்ட பீகார் அரசு!
