தென்காசி: திருநெல்வேலி மாவட்டத்தில் இருந்து தென்காசி பிரிக்கப்பட்டு புதிய மாவட்டமாக உதயமாகி ஓராண்டு கடந்த நிலையில், புது மாவட்ட ஆட்சியர் அலுவலக கட்டடத்திற்கான இடம் தேர்வு செய்யும் பணியானது பல்வேறு குளறுபடிகளுக்கு இடையே நடைபெற்றது. முதலில், ஆயிரப்பேரி பகுதியில் இடம் தேர்வு செய்யப்பட்ட நிலையில், அப்பகுதி விவசாய நிலம் எனவும், பொதுமக்கள் வந்து செல்ல முறையான வசதியில்லை எனவும் கூறி திமுக உள்ளிட்ட எதிர்க்கட்சியினர் எதிர்ப்பு தெரிவித்தனர்.
இதைத்தொடர்ந்து, தென்காசி அரசு மருத்துவமனை அருகில் 13 ஏக்கர் பரப்பளவிலான இடம் தேர்வு செய்யப்பட்டது. 119 கோடி ரூபாய் செலவில் அமையவுள்ள மாவட்ட ஆட்சியர் அலுவலகத்திற்கான அடிக்கல் நாட்டும் நிகழ்ச்சி இன்று நடைபெற்றது. அரசு விழாவான இந்நிகழ்ச்சிக்கு திமுக, அதன் கூட்டணி கட்சி எம்எல்ஏக்களுக்கு அழைப்பு விடுக்கப்படவில்லை.
இதுகுறித்து ஆலங்குளம் சட்டப்பேரவை உறுப்பினர் ஆலடி அருணா பேசியபோது, திமுகவின் போராட்டத்தால் மாவட்ட ஆட்சியர் அலுவலகத்துக்கான இடம் மாற்றியமைக்கப்பட்டுள்ளது. திமுக சுட்டிக்காட்டிய இடத்தில் மாவட்ட ஆட்சியர் அலுவலகம் அமைக்கப்படுவதன் காரணமாக திமுக சட்டப்பேரவை உறுப்பினர்கள் அழைக்கப்படவில்லை. இது அதிமுகவின் பயத்தை காட்டுகிறது. தாங்கள் ஆளுங்கட்சியாக இருப்பதன் ஆணவம் காரணமாக அழைப்பு மறுக்கப்பட்டுள்ளது. இது நீடிக்கப்போவதில்லை" என்றார்.
இதையும் படிங்க: தென்காசி மாவட்ட ஆட்சியர் அலுவலகம் கட்டட பூமி பூஜை
