பல்வேறு அரசு மற்றும் தனியார் நிகழ்ச்சிகளில் கலந்துகொள்வதற்காக சேலம் வந்திருந்த முதலமைச்சர் எடப்பாடி பழனிசாமி சேலம் புறநகர் அதிமுக மாவட்ட அலுவலகத்தில் செய்தியாளர்களை சந்தித்தார்.
அப்போது அவர், ஆறு மாதத்தில் ஆட்சிக் கவிழ்ந்துவிடும் என்று சொன்னார்கள். ஆனால் மூன்று ஆண்டுகள் ஆகிவிட்டன. அடுத்த தேர்தலிலும் அதிமுக ஆட்சியை அமைக்கும் எனத் திட்டவட்டமாகத் தெரிவித்தார்.
தினகரன் கட்சியினர் கேட்பொலி (ஆடியோ) வெளியிடட்டும், நாங்களும் அதற்குத் தயாராக இருக்கிறோம் என சொன்ன எடப்பாடி பழனிசாமி, தினகரன் ஏதாவது டூப் விட்டுக்கொண்டுதான் இருப்பார் என்றார்.
ஸ்லீப்பர் செல் இருப்பதாக தினகரன் கூறியதை சுட்டிக்காட்டிய பழனிசாமி, இப்போது எல்லாம் தங்களிடம் வந்துவிட்டதாகக் கூறினார். சாரை சாரையாக தாய்க்கழகத்திற்கு அம்மா மக்கள் முன்னேற்றக் கழகத்தினர் வந்துகொண்டிருப்பதாக மகிழ்ச்சி தெரிவித்தார்.
சட்டக்கல்லூரி தொடர்பான கேள்விக்கு பதிலளித்த பழனிசாமி, சேலத்தில் அரசின் சார்பாக புதிய அரசு சட்டக் கல்லூரி ஒன்று இந்த ஆண்டு தொடங்கப்படும் என்று உறுதியளித்தார்.
