மேம்பாலம் கட்டாததால் தேர்தலைப் புறக்கணிக்கும் கிராம மக்கள்!

சேலம்: அயோத்தியாப்பட்டணம் அருகே ரயில்வே மேம்பாலம் அமைத்துத் தர மத்திய-மாநில அரசுகளை வலியுறுத்தி அப்பகுதி மக்கள் தேர்தல் புறக்கணிப்பு போராட்டத்தில் ஈடுபட்டதால் பரபரப்பு ஏற்பட்டுள்ளது.

சேலம் மாவட்டம், அயோத்தியாப்பட்டணம் அடுத்த எம்.பெருமாபாளையம் கிராமப் பகுதியில், சேலம் - விருத்தாசலம் ரயில் மார்க்கம் செல்கிறது.

இந்தப் பகுதியில் கடந்த 60 ஆண்டுகளாக ரயில்வே மேம்பாலம் அல்லது சுரங்கப்பாதை அமைத்துத் தரக்கோரி கிராம மக்கள் மத்திய அரசுக்கும், மாநில அரசுக்கும் பலமுறை கோரிக்கை வைத்துள்ளனர்.

ஆனால், ஒவ்வொரு முறை தேர்தல் வரும்போதும் அனைத்து அரசியல் கட்சிகளின் வேட்பாளர்களும், சுரங்கப்பாதை அல்லது ரயில்வே மேம்பாலம் அமைத்துத் தருவோம் என்று வாக்குறுதி அளித்துத் தேர்தல் முடிந்ததும் அவர்கள் மறந்துவிடுவதாக எம்.பெருமாபாளைய கிராம மக்கள் புகார் தெரிவித்துவருகின்றனர்.

இந்நிலையில், இன்று அந்த கிராம மக்கள் வீடுகளில் கறுப்புக் கொடி கட்டி தேர்தல் புறக்கணிப்புப் போராட்டத்தில் ஈடுபட்டனர். அப்போது, மத்திய-மாநில அரசுகளுக்கு எதிராக அக்கிராம மக்கள் முழக்கங்கள் எழுப்பினர்.

போராட்டத்தின்போது பேட்டியளித்த எம்.பெருமாபாளையத்தைச் சேர்ந்த லட்சுமணன் கூறும்போது, "எங்கள் கிராமத்தில் 450 குடியிருப்புகளில் 992 வாக்குகள் உள்ளன. ஒவ்வொரு முறை மக்களவைத் தேர்தல், சட்டப்பேரவைத் தேர்தல் வரும் பொழுதும் முக்கிய அரசியல் கட்சிகளின் வேட்பாளர்கள் எங்கள் கிராமம் தேடி வாக்கு சேகரிக்க வருவார்கள்.

அப்போது, கண்டிப்பாக எங்களுக்கு ரயில்வே மேம்பாலம் அல்லது சுரங்கப்பாதை அமைத்துக் கொடுக்கப்படும் என்று வாக்குறுதி அளித்து வாக்குகளைப் பெற்றுக் கொள்வார்கள்.

பின்னர், வெற்றிபெற்றதும் எங்களிடம் அளித்த வாக்குறுதியை மறந்துவிட்டு அவர்கள் வேறு வேலையைப் பார்க்கச் சென்று விடுவார்கள். இப்படியே, 60 ஆண்டுகளாக நாங்கள் ஏமாந்து வருகிறோம்.

அதனால், இந்தமுறை நடைபெற உள்ள மக்களவைத் தேர்தலை நாங்கள் உறுதியாக புறக்கணிக்கிறோம்.

அதே சமயம் எங்கள் பகுதிக்கு அதிமுக, திமுக உள்ளிட்ட எந்த அரசியல் கட்சிகளின் வேட்பாளர்கள் வாக்கு சேகரிக்க வந்தாலும் ஊருக்குள் நுழைய விடமாட்டோம். திருப்பி அனுப்பி விடுவோம்.

இன்னும் ஒரு வாரம் கழித்து சேலம் மாவட்ட ஆட்சியரிடம் எங்களுடைய நியாயவிலைக் கடை அட்டையையும் வாக்காளர் அடையாள அட்டையையும் திருப்பி அளிக்கவும் முடிவு செய்துள்ளோம்.

சேலம் - விருத்தாசலம் ரயில்வே மார்க்கம் வழியாகத் தினமும் ரயில்கள் வந்து செல்கின்றன. இதனால் ரயில்வே பாதையைக் கடந்து பள்ளி,கல்லூரி, மருத்துவமனை ஆகியவற்றுக்குச் செல்லமுடியாத சூழல் நிலவுகிறது.

எம். பெருமாபாளையம் கிராம மக்கள் மத்திய அரசாலும், மாநில அரசாலும் புறக்கணிக்கப்பட்ட நிலையில் இருக்கிறோம். ரயில்வே பாதையைக் கடக்க இயலாமல் 10 கிலோ மீட்டர் தூரம் சுற்றி வந்து அயோத்தியாப்பட்டணம், வாழப்பாடி, சேலம் செல்ல வேண்டிய அவல நிலை இருக்கிறது.

எனவே எங்களின் கோரிக்கையான ரயில்வே மேம்பாலம் அல்லது சுரங்கப் பாதையை அமைத்துத் தர மத்திய அரசு நடவடிக்கை எடுக்க வேண்டும் " என கேட்டுக் கொண்டார்.