“பால் கொள்முதல் விலையை உயர்த்தவில்லை எனில் முக்காடு போராட்டம்” - பால் உற்பத்தியாளர் சங்கத்தினர் அறிவிப்பு!

TN milk producer: பால் உற்பத்தியாளர்களின் கோரிக்கையை நிறைவேற்ற வலியுறுத்தி போராட்டங்களை முன்னெடுத்தால், அதிகாரிகள் மூலம் அரசு பிரித்தாலும் சூழ்ச்சியை கையாள்கின்றனர் என்று தமிழ்நாடு விவசாயிகள் சங்க பால் உற்பத்தியாளர்கள் குற்றம் சாட்டுகின்றனர்.

சேலம்: அதிக சத்துள்ள பாலுக்கு கொள்முதல் விலை உயர்த்தப்பட்டுள்ளதாக தமிழக அரசு அறிவித்துள்ள அறிவிப்பு ஒரு ஏமாற்று வேலையாகத் தெரிகிறது என்பதால், அரசைக் கண்டித்து மாநிலம் தழுவிய அளவில் ஆவின் உள்ளிட்ட பால் கொள்முதல் நிலையங்கள் முன்பு முக்காடு போட்டு போராட்டம் நடத்த உள்ளதாக தமிழ்நாடு விவசாயிகள் சங்க பால் உற்பத்தியாளர் பிரிவின் மாநிலச் செயலாளர் பெரியண்ணன் சேலத்தில் தெரிவித்தார்.

இது குறித்து பெரியண்ணன் செய்தியாளர்களைச் சந்தித்து பேசுகையில், “பசும்பால் கொள்முதல் விலையை ரூபாய் 42 ஆகவும், எருமைப்பால் கொள்முதல் விலையை ரூபாய் 55 ஆகவும் உயர்த்தி வழங்க வேண்டும் என்பது பால் உற்பத்தியாளர்களின் நீண்ட நாள் கோரிக்கை.

இந்தக் கோரிக்கையை அரசு நிறைவேற்றாவிட்டால், திருச்சியில் நடந்த செயற்குழு கூட்டத்தின் அடிப்படையில் விரைவில் ஆவின் கூட்டுறவு பால் பண்ணைகள் முன்பு முக்காடு அணிந்து போராட்டத்தில் ஈடுபட உள்ளோம். மற்ற மாநிலங்களில் ஒரு லிட்டர் பால் கொள்முதல் விலை 40 ரூபாய்க்கு மேல் கொள்முதல் செய்யப்படுகிறது. ஆனால், தமிழகத்தில் ஒரு லிட்டர் பால் கொள்முதல் விலை 32 ரூபாய் மட்டுமே.

அதிக சத்துள்ள பாலுக்கு ஒரு ரூபாய் கொள்முதல் விலையை உயர்த்தி வழங்குவதாக அரசு அறிவித்துள்ளது ஒரு ஏமாற்று வேலை.
தமிழ்நாட்டில் பாலுக்கான கொள்முதல் விலையை உயர்த்தாதது தனியார் பால் நிறுவனங்களுக்கு துணைபோகும் செயலாகும்.
கொள்முதல் விலை குறைந்த நிலையில் இருப்பதால், எங்களுக்கு ஆண்டுக்கு 545 கோடி ரூபாய் இழப்பு ஏற்பட்டுள்ளது.

இதையும் படிங்க: "சனாதன தர்மம் எந்தவொரு பாகுபாட்டையும் ஆதரிக்காது" - ஆளுநர் ஆர்.என்.ரவி பேச்சு

அதை இரண்டு ஆண்டுக்கு மேலாகியும் தமிழக அரசு எங்களுக்கு வழங்கவில்லை. இதனால் எங்களுக்கு பால் பணம் வருவதில் தாமதம் ஏற்படுகிறது. 40 நாட்கள் பால் பணம் கிடைக்காமல் நிலுவையில் வைக்கப்பட்டுள்ளது. இதனால் பால் உற்பத்தியாளர்கள் மிகுந்த பொருளாதார சிரமத்திற்கு ஆளாகியுள்ளோம்.

மேலும், ஈவுத் தொகை கூட அரசு எங்களுக்கு வழங்கவில்லை. உடனடியாக தமிழக அரசு பசும்பால் ஒரு லிட்டருக்கு 42 ரூபாய்க்கும், எருமைப்பால் ஒரு லிட்டருக்கு 55 ரூபாய்க்கும் கொள்முதல் செய்யப்படும் என்று அறிவிப்பு வெளியிட வேண்டுமென கேட்டுக் கொள்கிறோம்.

இல்லையென்றால் மாநிலம் தழுவிய அளவில் ஆவின் உள்ளிட்ட பால் கொள்முதல் நிலையங்கள் முன்பு கருப்பு பட்டை அணிந்து தலையில் முக்காடு போட்டு போராட்டத்தில் ஈடுபட முடிவு செய்துள்ளோம்” என்று தெரிவித்தார். மேலும், பால் உற்பத்தியாளர்களின் கோரிக்கையை நிறைவேற்ற வலியுறுத்தி போராட்டங்களை முன்னெடுத்தால் அதிகாரிகள் மூலம் அரசு பிரித்தாலும் சூழ்ச்சியைக் கையாள்கின்றனர் என்றும் அவர் குற்றம் சாட்டினார்.

இதையும் படிங்க: டி.ஆர்.பாலு தொடர்ந்த அவதூறு வழக்கு: தன் மீது தவறில்லை என அண்ணாமலை மறுப்பு!