சேலம்: காடையாம்பட்டி அருகே மரக்கோட்டை ஊராட்சியில் வசிக்கும் மாரிமுத்து மகன் அஜித்வேலும் அவரது வீட்டின் அருகே வசிக்கும் மாணிக்கம் மகள் பூர்ணிமாவும் பல ஆண்டுகளாக காதலித்து வந்துள்ளனர்.
இதையடுத்து இருவரின் காதல் விவகாரம் பூர்ணிமாவின் பெற்றோருக்கு தெரியவந்தது. அதற்கு எதிர்ப்பு தெரிவித்து, பெற்றோர் பூர்ணிமாவை சமரசம் செய்து கடந்த 10 நாட்களுக்கு முன்பு, அவரின் அத்தை மகனுக்கு திருமணம் செய்து வைத்தனர். இதையறிந்த காதலன் அஜித் வேல் விஷம் குடித்து தற்கொலைக்கு முயன்று, மருத்துவமனையில் சிகிச்சை பெற்று வீடு திரும்பினார்.
இந்த நிலையில் காதலி பூர்ணிமா தனது காதலன் தற்கொலைக்கு முயன்ற காரணத்தால் அவர் மீது உள்ள காதலால், தனது கணவருடன் தினமும் சண்டையிட்டு வந்ததாக தெரிகிறது. இதனையடுத்து காதலன் அஜித்வேல் மற்றும் பூர்ணிமா ஆகிய இருவரும் நேற்று இரவு தங்களது வீட்டை விட்டு வெளியேறினர்.
இந்த தகவலை அறிந்த பெண் வீட்டார் ஆத்திரத்தில் இன்று அதிகாலை காதலனின் வீடுகளையும் அடித்து நொறுக்கினர். பின்னர் வீட்டின் அருகே நிறுத்தியிருந்த சரக்கு வாகனம், குடிநீர் டேங்க் உள்ளிட்ட பல லட்சம் மதிப்பிலான பொருட்களை தீயிட்டு கொளுத்தினர்.
மேலும் அங்கிருந்த டிராக்டரின் இரண்டு சக்கரங்களை தீயிட்டு கொளுத்தி அடித்து நொறுக்கி ஆத்திரம் தணியாத நிலையில், பெண்ணின் உறவினர்கள் அங்கிருந்து சென்றனர்.
இந்த சம்பவம் குறித்து அஜித்வேலின் தாயார் தங்கமணி தீவட்டிப்பட்டி போலீசில் புகார் செய்தார். சொத்தை சேதப்படுத்துதல் உள்ளிட்ட பல்வேறு பிரிவுகளின் கீழ் போலீசார் வழக்கு பதிவு செய்து விசாரணை நடத்தி வந்தனர். இது தொடர்பாக பூர்ணிமாவின் தந்தை மாணிக்கம், அதே பகுதியை சேர்ந்த ராஜா என்ற சுப்பிரமணி, கணபதி உள்ளிட்ட மூன்று பேரை காவல்துறையினர் கைது செய்தனர்.
காதலுக்கு எதிர்ப்பு தெரிவித்து பெண்ணின் உறவினர்கள் காதலன் வீட்டை அடித்து நொறுக்கி வாகனங்களுக்கு தீ வைத்து எரித்த சம்பவம் சேலத்தில் பெரும் பரபரப்பை ஏற்படுத்தி உள்ளது.
இதையும் படிங்க: 'ஸ்ரீமதியின் மரணத்தை மறைக்க பார்க்கிறார்கள்' தாயார் செல்வி குற்றச்சாட்டு
