மத்திய அரசு கொண்டுவந்துள்ள குடியுரிமை திருத்தச் சட்டத்திற்கு எதிராக நாடு முழுவதும் போராட்டங்கள் நடைபெற்றுவருகின்றன. சமூக ஆர்வலர்களும், இளைஞர்களும் தங்களது எதிர் கருத்துக்களை தெரிவித்துவருகின்றனர். அதன் ஒரு பகுதியாக சேலம் கோட்டை மைதானத்தில் கடந்த 24 நாட்களாக சிஏஏ-வுக்கு எதிராக இஸ்லாமியர்கள் தர்ணாவில் ஈடுபட்டுவருகின்றனர்.
இன்று தமிழ்நாடு சட்டப்பேரவை கூடிய நிலையில், சட்டப்பேரவையில் குடியுரிமை திருத்தச் சட்டத்தை எதிர்த்து தீர்மானம் நிறைவேற்ற வலியுறுத்தி பல்வேறு இஸ்லாமிய அமைப்பினர் ஆயிரத்திற்கும் மேற்பட்டோர் திரண்டு சேலம் மாவட்ட ஆட்சியர் அலுவலகத்தை முற்றுகையிட்டனர். மேலும், அவர்கள் மாவட்ட ஆட்சியர் அலுவலகத்தில் குடியேறும் போராட்டம் நடத்தவும் திட்டமிட்டு அலுவலகத்திற்குள் நுழைய முயன்றனர். அப்போது பாதுகாப்பு பணியில் ஈடுபட்டிருந்த காவலர்கள் போராட்டக்காரர்களை தடுத்தி நிறுத்தினர்.
இதனையடுத்து இரு தரப்பினருக்கும் வாக்குவாதம் ஏற்பட்டது. பின்னர் போராட்டக்காரர்கள் மாவட்ட ஆட்சியர் அலுவலக நுழைவு வாயில் எதிரே உள்ள சாலையில் அமர்ந்து, மத்திய அரசை கண்டித்தும், சிஏஏ சட்டத்தை எதிர்த்து சாலை மறியலில் ஈடுபட்டதால் பெரும் பரபரப்பு நிலவியது. தகவலறிந்து சம்பவ இடத்திற்கு வந்த சேலம் மாநகர காவல் துறை அலுவலர்கள், இஸ்லாமிய அமைப்பினரிடம் பேச்சுவார்த்தை நடத்தி அவர்களை கைது செய்தனர்.
மேலும்,15க்கும் மேற்பட்ட பேருந்துகளில் போராட்டத்தில் ஈடுபட்டவர்கள் கைது செய்யப்பட்டு தனியார் மண்டபத்தில் தங்க வைக்கப்பட்டனர்.
இதையும் படிங்க: 'மாணவர்களுக்கு பாலினப்பாகுபாடு குறித்த ஆலோசனையைத் தாருங்கள்' - ஆசிரியர்களுக்கு பள்ளிக்கல்வித்துறை கடிதம்
