சேலம் : இது குறித்து உணவுப் பாதுகாப்பு துறை அதிகாரிகள் கூறுகையில், “சேலம் மாவட்டத்தின் பல்வேறு பகுதிகளில் கலப்பட வெல்லம் தயாரிப்பதைத் தடுக்கும் வகையில் பல்வேறு அதிரடி சோதனை நடவடிக்கைகள் மாவட்ட உணவுப் பாதுகாப்பு துறை அதிகாரிகள் மேற்கொண்டு வருகின்றனர்.
அந்த வகையில் இன்று (ஜன.06) உணவு பாதுகாப்புத்துறைக்கு கிடைத்த ரகசிய தகவலின் அடிப்படையில் மாவட்ட நியமன அலுவலர் உத்தரவின் பேரில் உணவு பாதுகாப்பு அலுவலர்கள் கண்ணன், குமரகுருபரன், ரமேஷ் ஆகியோர் அடங்கிய குழுவினர் சங்ககிரி வட்டம், தேவூர் அஞ்சல், செட்டிபட்டி ரோடு, சோலக்கவுண்டனூர் பகுதியில் அமைந்திருந்த குடோனில் சோதனை நடத்தினர்.
சோதனையில் நாட்டுச் சர்க்கரை தயாரிப்பில் கலப்படம் செய்வதற்காக வைக்கப்பட்டிருந்த 6 டன் வெள்ளைச்சர்க்கரை மூட்டைகள் கைப்பற்றப்பட்டன. இதன் மதிப்பு சுமார் இரண்டு லட்சம் ரூபாய் ஆகும். சம்பந்தப்பட்ட உரிமையாளருக்கு விளக்கம் கேட்டு நோட்டீஸ் வழங்கப்பட்டது. இதனைத் தொடர்ந்து இன்று (ஜன.06) கொங்கணாபுரம், மகுடஞ்சாவடி மற்றும் இடப்பாடி சுற்று வட்டாரப்பகுதிகளில் அமைந்துள்ள 7 கரும்பாலைகளில் ஆய்வு மேற்கொள்ளப்பட்டது.
இவற்றில் எடப்பாடி மெயின் ரோடு, கன்னந்தேரி பகுதியில் அமைந்திருந்த சின்னமுத்து கரும்பாலையில் வெல்லம் மற்றும் நாட்டுச்சர்க்கரையில் கலப்படம் செய்வதற்காக வைக்கப்பட்டிருந்த 34 மூட்டைகளும், மயிலாண்டி வலவு, சமுத்திரம் பகுதியில் அமைந்துள்ள சின்ன பையன் கரும்பாலையில் 14 மூட்டைகளும் மொத்தமாக 2400 கிலோ கைப்பற்றப்பட்டு சீல் வைக்கப்பட்டது.
இதுவரை சேலம் மாவட்டத்தில் கடந்த 45 நாட்களில் மொத்தம் 45ஆயிரத்து 250 கிலோ கலப்படம் செய்வதற்காக வைக்கப்பட்டிருந்த வெள்ளைச் சர்க்கரை கைப்பற்றப்பட்டுள்ளது. மேலும் 130 ஆலைகளில் இதுவரை கண்காணிப்பு கேமரா பொருத்தப்பட்டுள்ளது. மீதியுள்ள ஆலைகளில் கண்காணிப்புக் கேமரா பொருத்தும் பணி நடைபெற்று வருகிறது” எனத் தெரிவித்தனர்.
இதையும் படிங்க: கெட்டுப்போன உணவு வாடிக்கையாளருக்கு டெலிவரி செய்யப்பட்டதா?!- என்னவாம்
