தமிழ்நாட்டில் சுற்றுச்சூழலைப் பாதுகாத்து, நிலம், நீர் ஆகியவை மாசு அடைவதைத் தடுக்கும் வகையிலும், கால்நடை உயிரினங்களைக் காப்பாற்றும் நோக்கிலும் மாநில அரசு பல்வேறு நடவடிக்கைகளை மேற்கொண்டு வருகிறது.
மகாத்மா காந்தி பிறந்த நாளான இன்று எடப்பாடி பேருந்து நிலையத்தில் தூய்மை பாரதம் திட்டப் பணிகளின் ஒரு பகுதியாக எடப்பாடி நகராட்சி சார்பில், ஒருமுறை மட்டுமே பயன்படுத்தி தூக்கி எறியப்படும் நெகிழி தடை குறித்த விழிப்புணர்வு நிகழ்ச்சி மற்றும் உறுதிமொழி ஏற்பு நிகழ்வு நடைபெற்றது. இந்த விழிப்புணர்வு நிகழ்ச்சியில் நகராட்சி ஆணையர் மற்றும் சுகாதார அலுவலர்கள் கலந்துகொண்டனர்.
தொடர்ந்து, நகரின் அனைத்துப் பகுதிகளிலும் ஒட்டுமொத்த நெகிழிக் கழிவுகள் சேகரிப்புப் பணி மேற்கொள்ளப்பட்டது. அதில் மொத்தம் 102 கிலோ பயன்படுத்திய நெகிழிக் கழிவுகளும் ஏழு கிலோ நெகிழிப் பைகள் கடைகளிலிருந்தும் பறிமுதல் செய்யப்பட்டன.
பேருந்து நிலைய பகுதிகளில் நெகிழிப் பைகளை பயன்படுத்திய பொதுமக்களுக்கு துணிப்பைகளை பயன்படுத்திட வலியுறுத்தி துணிப்பைகள் நகராட்சி சார்பில் வழங்கப்பட்டன.
இதையும் படிக்கலாமே: காந்தி 150: ஈடிவி பாரத்தின் காந்தி சிறப்புப் பாடல்
