மனுதர்ம நூலை தடைசெய்ய வலியுறுத்தி விடுதலைச் சிறுத்தைகள் கட்சி சார்பில் சேலம் மாவட்ட ஆட்சியர் அலுவலகம் அருகில் ஆர்ப்பாட்டம் நடைபெற்றது. திராவிடர் விடுதலை கழகத் தலைவர் கொளத்தூர் மணி தலைமையில் நடைபெற்ற இந்த ஆர்ப்பாட்டத்தில், சேலம் மாவட்ட விடுதலைச் சிறுத்தைகள் கட்சி மாநகர மாவட்டத் துணைச்செயலாளர் காயத்ரி உள்ளிட்ட நூற்றுக்கும் மேற்பட்டோர் கலந்துகொண்டனர்.
ஆர்ப்பாட்டத்தின்போது மனுதர்ம நூலில் பெண்கள் குறித்து கூறப்பட்டுள்ள செய்திகளை கொளத்தூர் மணி படித்துக் காண்பித்து விளக்கமாக உரையாற்றினார்.
பின்னர் செய்தியாளர்களுக்கு கொளத்தூர் மணி அளித்த பேட்டியில், "மனுதர்ம சாஸ்திரம் குறித்து திருமாவளவன் பேசிவிட்டார் என்பதற்காக அவர் மீது வழக்குப்பதிவு செய்யப்பட்டுள்ளது.
உண்மையில் மனுதர்ம நூலுக்கு எதிர்ப்புத் தெரிவிக்க வேண்டியவர்கள் முதலில் பிராமணர்கள்தான். மனுதர்ம நூலில் உண்மையிலேயே பெண்களை இழிவுபடுத்தும் வகையில் புராணக்கதைகள் இடம்பெற்றுள்ளன.
அந்த நூலை இந்து முன்னணியினர் முழுமையாகப் படித்துவிட்டு விவாதத்திற்கு வர வேண்டும். நூலில் இடம்பெறாத புராணக்கதைகளை திருமாவளவன் கூறிவிடவில்லை. மனுதர்ம நூலை எதிர்த்து பெரியார், அம்பேத்கர் ஆகியோர் எரிப்புப் போராட்டங்கள் நடத்தி உள்ளனர்.
அதனால்தான் தற்போது அந்த நூலை தடைசெய்ய வேண்டும் என்று போராட்டம் நடத்துகிறோம். தடை செய்யாவிட்டால் மீண்டும் அடுத்தகட்டமாக நடத்தப்படும் போராட்டங்களில் மனுதர்ம நூலை எரிப்போம்" எனத் தெரிவித்தார்.
ஆர்ப்பாட்டம் நடத்த அனுமதி இல்லாத நிலையில் கொளத்தூர் மணி தலைமையில் கூடி ஆர்ப்பாட்டம் நடத்திய நூற்றுக்கும் மேற்பட்டவர்களைக் காவல் துறையினர் கைதுசெய்தனர்.
இதையும் படிங்க: 'சீறும் புலி'யில் பிரபாகரனாக சீறிப்பாயும் பாபி சிம்ஹா
