சேலம் மாவட்டம், ஓமலூரை அடுத்த செம்மாண்டபட்டி கிராமத்தைச் சேர்ந்தவர்கள் மாணிக்கம் - லட்சுமி தம்பதி. இவர்களுக்கு தொடர்ச்சியாக ஏழு பெண் குழந்தைகள் பிறந்தால் சுற்றுவட்டாரத்தில் உள்ள கோயிலுக்கு எல்லாம் சென்று தவமிருந்து பிறந்தவர் தான் வெங்கடேஷ். வீட்டின் கடைசிப் பிள்ளையாக பிறந்ததால் ஏழு சகோதரிகளும் தம்பி மீது அளவு கடந்த பாசத்தை கொடுத்து அன்பாக வளர்த்தனர். சகோதரின் அன்பு மற்றும் பெற்றோரின் அரவணப்பில் வளர்ந்த வெங்கடேஷ், பள்ளிப்படிப்பை ஒமலூர் பகுதியில் படித்தார்.
விவசாய குடும்பத்தில் பிறந்த வெங்கடேஷூக்கு சிறுவயது முதல் வனத்தின் மீது இருந்த ஆர்வம் காரணமாக அது சார்ந்த படிப்பை தேர்வு செய்ய தூண்டியது. அதன்காரணமாக அவர் கோவை மாவட்டம், மேட்டுபாளையத்தில் உள்ள வனக்கல்லூரியில் இளங்கலை படிப்பை தொடர்ந்தார்.
இளங்கலை படிப்பை வெற்றிக்கரமாக முடித்த அவர் எளிதில் வனஅலுலவர் பதவியை பிடித்து விடவில்லை. சென்னைக்கு சென்று ஐந்து வருடமாக கடினமாக உழைத்து விடாமுயற்சியுடன் வனஅலுவலர் தேர்வை எழுதி அதில் இன்று வெற்றியும் கண்டு இந்திய அளவில் 58ஆவது இடத்தை பிடித்துள்ளார்.
விவசாய குடும்பத்தில் பிறந்து ஏழு சகோதரிகளின் பாசபிணைப்பில் வளர்ந்த வெங்கடேஷ் இன்று வனஅலுவலராக உயர்ந்து நிற்கிறார். இது சேலம் மாவட்டத்திற்கு மட்டுமில்லாமல் ஒட்டுமொத்த தமிழ்நாட்டிற்கும் பெருமையாகும்.
இதுகுறித்து சாதனை மாணவர் வெங்கடேஷ் கூறுகையில், "கிராமப் பின்னணியில் விவசாய குடும்பத்தில் எட்டாவது குழந்தையாக பிறந்த எனக்கு பெற்றோரும், சகோதரிகளும் மிகுந்த உற்சாகமும், ஊக்கமும் கொடுத்து வளர்த்தனர். அம்மா லட்சுமியும், அப்பா மாணிக்கமும் மிகுந்த சிரமப்பட்டு எனது கல்விக்காக தங்களின் வாழ்நாளையே அர்ப்பணித்து இருக்கிறார்கள். எனது வெற்றிக்கு அவர்கள் மிகுந்த உறுதுணையாக இருக்கிறார்கள்.
ஓமலூர் பகுதியில் பள்ளிக் கல்வியை முடித்தேன். அதன் பிறகு ஐஎஃப்எஸ் அலுவலராக வரவேண்டும் என்று திட்டமிட்டு, அதற்காக முறையான பயிற்சிகளை மேற்கொண்டேன்.மேட்டுப்பாளையம் வனக்கல்லூரியில் எனக்கு முன்னாள் படித்த சீனியர் மாணவர்கள் சரியான முறையில் வழிகாட்டுதல் செய்தனர்.
அதன் அடிப்படையில் சென்னை சென்று வேறொரு நிறுவனத்தில் பகுதி நேர வேலை செய்து கொண்டே நான் ஐஎப்எஃஸ் அலுவலர் தேர்வுக்கு இடைவிடாமல் படித்தேன்.கடந்த ஆண்டு தேர்வை எழுதி வெற்றி பெற்றுஇந்திய அளவில் 58 வது இடம் பிடித்துள்ளேன்.
இது எனக்கு மிகுந்த மகிழ்ச்சியை அளிக்கிறது. இதனால் எனது குடும்பத்தினரும் கிராமத்தினரும், மிகுந்த சந்தோஷத்துடன் எனக்கு வாழ்த்து தெரிவித்துள்ளனர் .திரிபுரா மாநிலத்தில் தற்போது இந்திய வனப் பணி அலுவலராக தேர்வு செய்யப்பட்டு இருக்கிறேன்.
அங்குள்ள மலைவாழ் மக்களின் கல்வி மற்றும் பொருளாதார மேம்பாட்டிற்காக பாடுபடுவேன்.அதுமட்டுமல்லாது வனம் இல்லையேல் நமது நாடு இல்லை என்பதை உணர்ந்து அதற்கு ஏற்ற வகையில் வனத்தை பாதுகாக்கும் வாழ்நாள் லட்சியம் நோக்கத்தோடு எனது பணியை திறம்பட செய்வேன்" என்றார்.
