ராமநாதபுரம் மாவட்டம் ராமேஸ்வரம் மீன்பிடித் துறைமுகத்திலிருந்து கடந்த 12ஆம் தேதி நெடுந்தீவு அருகே தங்கச்சிமடத்தைச் சேர்ந்த கிசிங்கர் என்பவருக்கு சொந்தமான படகில் மீன்பிடித்து கொண்டிருந்த மீனவர்கள் ஏழு பேரை எல்லை தாண்டி மீன்பிடித்தாக கூறி இலங்கை கடற்படை வழக்குப்பதிவு செய்து மீனவர்களை சிறையில் அடைத்தனர்.
இந்நிலையில், மீனவர்களின் வழக்கு விசாரணை இன்று இலங்கை ஊர்காவல்துறை நீதிமன்றத்திற்கு வந்தது. இந்த வழக்கை விசாரித்த நீதிபதி யூட்சன் வரும் காலங்களில் இலங்கை எல்லைக்குள் வரக்கூடாது என எச்சரித்து மீனவர்களை விடுதலை செய்து உத்தரவிட்டார்.
மேலும், விசை படகுக்கான உரிய ஆவணங்களுடன் வரும் அக்டோபர் மாதம் 29ஆம் தேதி படகின் உரிமையாளர் ஊர்காவல்துறை நீதிமன்றத்தில் ஆஜராக வேண்டும் என்றும், தவறும்பட்சத்தில் படகு இலங்கை அரசுடமையாக்கப்படும் என தீர்ப்பளித்தார்.
விடுதலை செய்யப்பட்ட மீனவர்கள் அடுத்த வாரம் தாயகம் திரும்புவார்கள் என்று எதிர்பார்க்கப்படுகிறது.
